რაბათში სტადიონის მშენებლობას ხმაური მოჰყვა

დღეს, 30 ივლისს ახალციხეში რაბათის დასახლებაში, მეჩეთის გვერდით მშენებარე სტადიონთან ხმაური იყო. ადგილობრივები სტადიონთან მცხოვრებ მელიქიძეების ოჯახს დაუპირისპირდნენ. კონფლიქტის მიზეზი ის საღორე, საქათმე და სათავსოებია, რომლებიც მელიქიძეებმა სტადიონის გვერდით, დაახლოებით, 10 წლის წინ ააშენეს. ადგილზე იმყოფებოდნენ ახალციხის მერიის წარმომადგენლებიც.

„აქ ათეული წლების განმავლობაში სულ სტადიონი იყო, მერე გააკეთეს საქათმეები და ბავშვები ვეღარ თამაშობდნენ. ახლა ახალ სტადიონს აშენებენ და მელიქიძეებს კიდევ იმ საღორეების დანგრევა არ უნდათ. მერის მოადგილემ კიდევ გვითხრა, პროექტში მაგ საქათმეების დანგრევა გათვალისწინებული არ არისო“, – ამბობს რაბათში მცხოვრები მანუშაკ მეროიანი.



ძველი მეჩეთის გვერდით რაბათში სტადიონს ახალციხის მერია ადგილობრივი ბიუჯეტიდან გამოყოფილი თანხით აკეთებს. პროექტს „მშენებელი 2004“ 54 320 ლარად ახორციელებს. სტადიონის მშენებლობა, რომლის მწვანე საფარის ფართობიც 330 კვმ–ია სამი დღის წინ დაიწყო.

„გვეგონა რომ მელიქიძეები იმ საქათმეებს აიღებდნენ. მაგრამ დღეს თქვეს, აღებას არ ვაპირებთო, თუ ავიღეთ, მანდ სტადიონს ვერ ააშენებთო. დაპირისპირება ამას მოჰყვა“, – გვიყვებიან ადგილობრივები .

მათი თქმით, სტადიონთან თამაში შეუძლებელია: „ფეკალიების სუნია, ბუზები და რწყილებია. თუ იწვიმა ის წყალი სად წავა?! საღორიდან სტადიონზე ჩამოვა“.



მეზობლების დამოკიდებულება უკვირთ მელიქიძეებს. ამბობენ, რომ დღეს დაპირისპირებას ადგილი არ ჰქონია: „არავითარი კონფლიქტი არ ყოფილა. პირიქით, მანდ სტადიონის გაკეთება რომ დაეჩქარებინათ, ჩვენ შევაგროვეთ ხელმოწერები“.

ფართობი, რომელიც მათ სტადიონის გვერდით უკავიათ, დაახლოებით 30 კვმ–ია. თუმცა დაკანონებული არ აქვთ.

„ავიღებთ, აბა რას ვიზამთ. თუ მერია ასე გადაწყვეტს ხოარ ვიჩხუბებთ?! მაგრამ დაკანონებული რომ გვქონდეს, არ ავიღებდით“, – ამბობს რუსუდან მელიქიძე.

ახალციხის მერიაში აცხადებენ, რომ პროექტი, რომლის მიხედვითაც რაბათში სტადიონი კეთდება იმ საქათმეებსა და საღორეებს, რაზეც დღეს დავა იყო არ ეხება.

„ეგ სახელმწიფო მიწაა, ამიტომ ფასადურად რომ ლამაზი იყოს, ბუნებრივია, საქათმეებს ავიღებთ“, – ამბობს ახალციხის მერის მოადგილე ზაზა გელაძე.

ადგილობრივებმა კი დღეს დილიდან მელიქიძეების საქათმეებისა და საღორეების აღების მოთხოვნით ხელმოწერების შეგროვება დაიწყეს.

„უკვე 30–მა კაცმა მოაწერა ხელი, ორშაბათს ამ ხელმოწერებს ახალციხის მერიაში შევიტანთ“, – ამბობს რაბათში მცხოვრები მურმან გვენეტაძე.



[თამუნა უჩიძე, ახალციხე]