”ავარიების შიშით ბავშვებს ეზოში ვერ ვუშვებთ”

თაბუკაშვილისა და ვაჟა-ფშაველას ქუჩებისკენ აღმართი გზა მიდის. გზის მარჯვენა მხარეს, დაბლა, ყოფილი სანიტარულ-ეპიდემიოლოგიორი სადგურის შენობაა, სადაც ამჟამად დევნილები ცხოვრობენ. გზას არც დამცავი ბორდიული მიყვება და არც რაიმე გამაფრთხილებელი ნიშანი დგას. ადგილობრივები ამბობენ, რომ გაუფრთხილებლობის გამო ხშირად დიდი სისწრაფით მიმავალი მძღოლები საჭეს ვეღარ იმორჩიელებენ და გზიდან მათ შენობასთან ვარდებიან.

”რამდენიმე ავარია მოხდა, ერთხელ სატვირთო, ერთხელ კი მსუბუქი ავტომობილი გადმოვარდა. სულ დაძაბული ვართ, რომ რამე არ მოხდეს. ავარიების შიშით ბავშვებს ეზოში ვერ ვუშვებთ, გვეშინია გზიდან მანქანა არ გადმოვარდეს და უბედურება არ დატრიალდეს“, - გვეუბნება თაბუკაშვილის ქუჩის მცხოვრები მაია მაისურაძე.

ამავე ქუჩაზე მცხოვრები ზინა სამსონიძე ამბობს, რომ რამდენიმე წლის წინ გზაზე გამაფრთხილებელი ნიშანი იდგა: ”როდესაც უბანში ინტერნეტი შემოიყვანეს და კაბელები მიწაში ჩაყარეს, საგზაო ნიშანი ამოიღეს და გადაგდეს. სამუშაოების დასრულების შემდეგ გამაფრთხილებელი ნიშანი აღარ დაუყენებიათ”.



ადგილობრივების თქმით, საფრთხე განსაკუთრებით ზამთარში იზრდება. ბოლო რამდენიმე დღეა გზა გაყინულია და მოძრაობა ყველა მანქანას უჭირს. ტექნიკური მარილი კი ამ ქუჩებზე არასოდეს დაუყრიათ.

ახალციხის მუნიციპალიტეტის გამგეობაში ამბობენ, რომ ტექნიკურ მარილს მხოლოდ ცენტრალურ ქუჩებზე ყრიან. შპს ”ოცხეს”, რომელიც ამ სამუშაოებს ასრულებს, შიდა, საუბნო ქუჩების მოვლა არ ევალება. რაც შეეხება გზის შეკეთებასა და გამაფრთხილებელ საგზაო ნიშანს, მუნიციპალიტეტის გამგებელი ბესიკ ხითარიშვილი ამბობს, რომ ამ საკითხს შესწავლის გარეშე ვერ გადაწყვეტენ. გზების რეაბილიტაციას გეგმავენ, მაგრამ კონკრეტულად რომელ უბნებში დაიწყება სამუშაოები ჯერ გარკვეული არაა. რაც შეეხება ა კონკრეტულ ქუჩებს, მათი ბედი საკითხის შესწავლის შემდგომ გადაწყდება.

”უნდა შედგეს ხარჯთაღრიცხვა, გამოცხადდეს ტენდერი. კარგი იქნება თუ მოსახლეობა დაწერს განცხადებას, თუ პრობლემა აქტუალურია და მწვავეა, სასწარფოდ იქნება რეაგირება“, - ამბობს ბესიკ ხითარიშვილი.

რაც შეეხება დამცავი ბარდიულის გაკეთებასა და შესაბამის საგზაო ნიშანს, ახალციხის საპატრულო სამსახურის საზოგადოებასთან ურთიერთობის სამსახურში განგვიმარტეს, რომ ამ საკითხს საგზაო-სატრანსპორტო სამსახური არეგულირებს. ქალაქის ხელმძღვანელობას შეუძლია აღნიშნულ სამსახურს წერილობით მიმართოს და პრობლემის მოგვარება სთხოვოს.

გამგეობაში კი ამბობენ, რომ როგორც კი მოახლეობის განცხადებას მიიღებენ, საკითხ შეისწვალიან და რეაგირებას ყველა უწყებას მოსთხოვენ.



[ნინო ბერიძე, ახალციხე]