წინასაარჩევნოდ ახალციხეში მედია ცენტრი გაიხსნება

მედიაცენტრი ახალციხეში 11 ივლისს, 13:00 საათზე გაიხსნება. მის ფარგლებში, მოხდება პრეზენტაცია და ჩასატარებელი ღონისძიებების დაგეგმვა. ასევე, ადგილობრივი აქტუალური საკითხების იდენტიფიცირება და შეგროვება ახალციხის სამოქალაქო სექტორის მონაწილეობით.

მედიაცენტრი მოქალაქეებს, ჟურნალისტებს, არასამთავრობო ორგანიზაციებს, კანდიდატებსა და პოლიტიკურ პარტიებს უსაფრთხო და ნეიტრალურ სივრცეებს შესთავაზებს, ინფორმაციის გავრცელებისა და დისკუსიებისთვის.

გარდა ამისა, მისი გახსნის მიზანია ხელს შეუწყოს კანდიდატებსა და მათ ამომრჩევლებს შორის დიალოგის წარმართვას, რათა მოქალაქეები გაეცნონ კანდიდატების საარჩევნო პროგრამებს და ინფორმირებული არჩევანი გააკეთონ.

მედიაცენტრში დაგეგმილია:

• მედია ბრიფინგების ორგანიზება; კანდიდატებს შორის წინასაარჩევნო დებატების მოწყობა/ჩატარება.
• ჟურნალისტებისთვის არჩევნებთან დაკავშირებით ამომწურავი ინფორმაციის მიწოდება (ცვლილებები საარჩევნო კოდექსში; არჩევნების ადმინისტრირების, ამომრჩეველთა რეგისტრაციისა და ხმის მიცემის პროცედურები; არჩევნებში მონაწილე პარტიებისა და მათი კანდიდატების სრულყოფილი სიები და ა.შ.).
• არჩევნების დღეს სადამკვირვებლო მისიების/ორგანიზაციების ბრიფინგები ჟურნალისტების, ადგილობრივი ორგანიზაციებისა და პოლიტიკური პარტიებისათვის. ასევე, თვითმმართველობის არჩევნებში მონაწილე კანდიდატების ბრიფინგები არჩევნების მიმდინარეობის შესახებ.

მედიაცენტრებში უზრუნველყოფილი იქნება ლაივ სტრიმების განსახორციელებლად საჭირო შესაბამისი ტექნიკური აღჭურვილობა და მაღალი სიჩქარის ინტერნეტი.

ახალციხის გარდა, მსგავსი მედია ცენტრი ქვეყნის მასშტაბით კიდევ რამდენიმე ქალაქში გაიხსნება.

მათი სამუშაო საათები: წინასაარჩევნო პერიოდში და არჩევნების შემდეგ ნოემბრის ჩათვლით: ორშაბათი - შაბათი 10:00 – 19:00 სთ. არჩევნების დღეს - 08:00 – 22:00 სთ. იქნება.

მედიაცენტრების ფინანსურ მხარდაჭერას უზრუნველყოფს ამერიკის შეერთებული შტატების საერთაშორისო განვითარების სააგენტო (USAID) სამოქალაქო საზოგადოების განვითარებისა და მოქალაქეთა ჩართულობის პროექტის (ACCESS) ფარგლებში.

[sknews.ge]