ავლაბრის სასახლეში საქართველოს ეროვნული უშიშროების საბჭოს სხდომა მიმდინარეობს

სხდომას პრეზიდენტი ხელმძღვანელობს. მას პრემიერი, პარლამენტის თავმჯდომარე, ასევე შს მინისტრი, სუს-ის ხელმძღვანელი, გენერალური შტაბის უფროსი და უშიშროების საბჭოს მდივანი ესწრებიან.

თურქეთში სამხედრო გადატრიალების მცდელობაა. სტამბულსა და ანკარაში მძიმე სამხედრო ტექნიკაა შეყვანილი. თურქეთის გენერალური შტაბი ხელისუფლების ხელში ჩაგდების შესახებ იუწყება. მათივე განცხადებით, თურქეთის ხელისუფლება დაპატიმრებულია. თურქმა სამხდრებმა ქვეყანაში სამხედრო მდგომარეობა და კომენდანტის საათი გამოაცხადეს.

თურქეთის პრეზიდენტმა რეჯეფ თაიფ ერდოღანმა განაცხადა, რომ მთავრობა კვლავ მოქმედია და არ დაუშვებს, ქვეყანაში დემოკრატიას საფრთხე შეექმნას. მან მოქალაქეებს ქუჩაში გასვლისკენ მოუწოდა. მოქალაქეები ქუჩაში გავიდნენ.

საქართველოს საგარეო საქმეთა სამინისტრო თურქეთში მყოფ საქართველოს მოქალაქეებს მოუწოდებს შეინარჩუნონ სიმშვიდე და თავი შეიკავონ ქუჩაში გადაადგილებებისგან.

ევროკავშირი თურქეთში მიმდინარე მოვლენებთან დაკავშირებით განცხადებას ავრცელებს. ევროკომისარი ფედერიკა მოგერინი „ტვიტერზე“ წერს, რომ მუდმივი კონტაქტი აქვს ბრიუსელთან და ანკარაში ევროკავშირის წარმომადგენლობასთან.

სააგენტო Associated Press-ის ცნობით, აშშ–ს პრეზიდენტი ბარაქ ობამა აცხადებს, რომ ყველა თურქულმა პარტიამ მხარი უნდა დაუჭიროს დემოკრატიული გზით არჩეულ მთავრობას. აშშ-ის პრეზიდენტი ასევე თავშეკვების მოწოდებით გამოვიდა.

[ნინო ნარიმანიშვილი, ახალციხე]