Jnews: ახალქალაქში დედა–შვილების მკვლელობაში ბრალდებული სამი პირია

Jnews–ის ფოტო

გამოცემა ისევ წყაროზე დაყრდნობით წერს, რომ სამივე ბრალდებული სოფელ ვაჩიანის მცხოვრებია.

„10 ივლისს, ღამით, კაჩოტიანების ოჯახში, გაქურდვის მიზნით 3 ახალგაზრდა შევიდა. მათ იმ თანხის წაღება სურდათ, რომელიც ცოტა ხნის წინ, ხაბაროვსკში მყოფმა ქმარმა გამოუგზავნა ოჯახს. სახლში ფანჯრიდან შევიდნენ, დიასახლისმა ახალგარზდები დაინახა და ამოიცნო, ამიტომ ბრალდებულებმა მას თავში არმატურა დაარტყეს. ამის შემდგ კი გოგონებიც მოკლეს. მკვლელობის შემდეგ, კვალის დაფარვის მიზნით, სახლის დაწვას შეეცადნენ. სახლი ბოლომდე არ დამწვარა, მაგრამ უმცროსი, მცირეწლოვანი შვილი, ნამწვისგან გაიგუდა“, – წერს გამოცემა.

შინაგან საქმეთა სამინისტროში ამ ეტაპზე ამ ინფორმაციას ისევ არ ადასტურებენ.

შეგახსენებთ, გუშინ, 10 ივლისს, ახალქალაქში, სოფელ ვაჩიანში, მეზობლებმა დედა, 37 წლის ქალი და მისი სამი შვილი საკუთარ სახლში გარდაცვლილი ნახეს. მომხდარს 109–ე მუხლის მე–3 ნაწილით იძიებენ. აღნიშნული მუხლი გულისხმობს რამდენიმე პირის განზრახ მკვლელობას დამამძიმებელ გარემოებაში.

ამ წუთებში ახალქალაქის რაიონულ სამმართველოში სოფელ ვაჩიანის მცხოვრებლები დაკითხვაზე ჰყავთ. შენობასთან კი დაკითხვაზე მყოფი პირების ახლობლები არიან შეკრებილი.


Jnews–ის ფოტო

[ნინო ნარიმანიშვილი, ახალქალაქი]