ახალქალაქში, დედა–შვილების სავარაუდო მკვლელობის ახალი დეტალები

jnews-ის ფოტო

Jnews.ge –ს ინფორმაციით, სოფელ ვაჩიანში, კაჩოიანების ოჯახის წევრების მკვლელობაში ბრალდებული დღეს დააკავეს. იგი იმავე სოფლის მცხოვრებია და შემთხვევის ადგილზე მარტო არ ყოფილა, თანამზრახველი ჰყავდა.

როგორც Jnews.ge , წყაროზე დაყრდნობით წერს, ბრალდებულები 10 ივლისს, ღამით შევიდნენ სახლში, გასაქურდად. დიასახლისმა წინააღმდეგობა გაუწია და თავში 'არმატურა' ჩაარტყეს. ამის შემდეგ მოკლეს ბავშვებიც.

Jnews.ge –ს ინფორმაციით, ნახევარი საათის წინ, სოფელ ვაჩიანში, სამართალდამცველები ისევ მუშაობდნენ. ისინი კვალს ეძებდნენ. ამ წუთებში ახალქალაქის პოლიციაში სოფელ ვაჩიანის მცხოვრებლები დაკითხვაზე ჰყავთ. დაკითხვაზე შეყვანილების ახლობლები კი პოლიციის შენობასთან არიან შეკრებილი და უკმაყოფილებას გამოთქვამენ. Jnews.ge წერს რომ მის რეპორტიორებს შენობასთან ახლოს არ უშვებენ.

არის თუ არა ვინმე ნამდილად დაკავებული, „სამხრეთის კარიბჭემ“ გარკვევა საქართველოს შინაგან საქმეთა სამინისტროში სცადა. საზოგადოებასთან ურთიერთობის სამსახურში განაცხადეს, რომ ამ ინფორმაციას ვერ ადასტურებენ.

„ერთადერთი, რაც შემიძლია გითხრათ, გამოძიება დაწყებულია სისხლის სამართლის კოდექსის 109–ე მუხლის მე–3 ნაწილით“, – განაცხადეს საზოგადოებასთან ურთიერთობის სამსახურში.

შეგახსენებთ, გუშინ, 10 ივლისს, ახალქალაქში, სოფელ ვაჩიანში, მეზობლებმა დედა, 37 წლის ქალი და მისი სამი შვილი საკუთარ სახლში გარდაცვლილი ნახეს. როგორც „სამხრეთის კარიბჭეს“ სასწრაფო დახმარების სამსახურში განუცხადეს, ადგილზე მისულ სამუშაო ჯგუფს სახლი და გვამები ნაწილობრივ დამწვარი დახვდა.

ახალქალაქი–ნინოწმინდის რაიონული პროკურორის მოადგილის ვასილ ოსიძის განმარტებით, მომხდარზე ძიება თავდაპირველად 240–ე მუხლის მე–2 ნაწილით დაიწყო, რაც გულისხმობს უსაფრთხოების წესების დარღვევას. თუმცა, მოგვიანებით საქმე გადაკვალიფიცირდა. ამ ეტაპზე საქმეს 109–ე მუხლის მე–3 ნაწილით იძიებენ. აღნიშნული მუხლი გულისხმობს რამდენიმე პირის განზრახ მკვლელობას დამამძიმებელ გარემოებაში.


[ნინო ნარიმანიშვილი, ახალქალაქი]