ახალქალაქში, დედა–შვილების გარდაცვალებაზე, ძიება განზრახ მკვლელობის მუხლით დაიწყო

ახალქალაქი–ნინოწმინდის რაიონული პროკურორის მოადგილის ვასილ ოსიძის განმარტებით, მომხდარზე ძიება თავდაპირველად 240–ე მუხლის მე–2 ნაწილით დაიწყო, რაც გულისხმობს უსაფრთხოების წესების დარღვევას. თუმცა, მოგვიანებით საქმე გადაკვალიფიცირდა.

მისი განმარტებით, ამ ეტაპზე საქმეს 109–ე მუხლის მე–3 ნაწილით იძიებენ. აღნიშნული მუხლი გულისხმობს რამდენიმე პირის განზრახ მკვლელობას დამამძიმებელ გარემოებაში.

კითხვაზე, რამ გამოიწვია საქმის გადაკვალიფიცირება, ხომ არ აღენიშნებათ გარდაცვლილებს ძალადობის კვალი, პროკურორი გვპასუხობს, რომ ესეც არის: „ძალადობის კვალიც არის გვამებზე და გარდა ამისა, ორი ან მეტი პირის სიკვდილია და ეს პირდაპირ გვაძლევს საფუძველს, რომ ამ მუხლით დავიწყოთ ძიება“.

როგორც პროკურორი განმარტავს, მომხდარიდან ჯერ 24 საათიც არ არის გასული. ამ დროისათვის სამედიცინო ექსპერტიზაზე მუშაობა უკვე დაწყებულია და დაინიშნება ყველა საჭირო ექსპერტიზა.

შეგახსენებთ, გუშინ, 10 ივლისს, ახალქალაქში, სოფელ ვაჩიანში, მეზობლებმა დედა, 37 წლის ქალი და მისი სამი შვილი (18, 16 და 5 წლის ასაკის) საკუთარ სახლში გარდაცვლილი ნახეს. როგორც „სამხრეთის კარიბჭეს“ სასწრაფო დახმარების სამსახურში განუცხადეს, ადგილზე მისულ სამუშაო ჯგუფს სახლი და გვამები ნაწილობრივ დამწვარი დახვდა.

პროკურატურის ინფორმაციით, სამართალდამცავები ადგილზე მთელი ღამის განმავლობაში მუშაობენ. მომხდარზე ოფიციალური ინფორმაცია საქართველოს შინაგან საქმეთა სამინისტროს ამ დრომდე არ გაუვრცელებია.

[ნინო ნარიმანიშვილი, თამუნა უჩიძე, ახალქალაქი]