რძის ნაწარმის ეტიკეტირებაზე კონტროლი მკაცრდება

რძის ტექნიკური რეგლამენტი საქართველოს მთავრობის დადგენილებით, ძალაში 2015 წლის 1 აგვისტოს შევიდა, თუმცა, ბიზნესის შეუფერხებლად მუშაობისთვის მწარმოებლებს ერთწლიანი საშეღავათო პერიოდი დაუდგინდათ.

მიმდინარე წლიდან კი რძის შემცვლელი პროდუქციის დასახელებაში სიტყვების: „მსგავსი“ და „ებრი“ გამოყენება იკრძალება. მაგალითად, რძისებრი ან რძის მსგავსი, არაჟნისებრი ან არაჟნის მსგავსი და სხვა.

რძის ტექნიკური რეგლამენტის ახალი ნორმა სურსათის ეროვნულ სააგენტოს წარმომადგენლებმა რძისა და რძის ნაწარმის მწარმოებელებსა და იმპორტიორებს გააცნეს.

რძის ტექნიკური რეგლამენტის მოთხოვნების შესაბამისად, 2016 წელს 1770 ბიზნესოპერატორის დოკუმენტური შემოწმება განხორციელდა და ეტიკეტირების წესის დარღვევის გამო 11 ბიზნესოპერატორი დაჯარიმდა.

რძესა და რძის ნაწარმში მცენარეული ცხიმის მონიტორინგის პროგრამის ფარგლებში აღებული 87 ნიმუშიდან დარღვევა 12 ნიმუშში გამოვლინდა.

„რძისა და რძის ნაწარმის შესახებ ტექნიკური რეგლამენტი“, რომელიც 2015 წლის 1 აგვისტოს ამოქმედდა, ადგენს მოთხოვნებს რძის, რძის ნაწარმის და რძის შემცველი პროდუქტის მიმართ და აწესრიგებს ბიზნესოპერატორის მიერ რძის, რძის ნაწარმის და რძის შემცველი პროდუქტის წარმოებისა და ბაზარზე განთავსების პირობებს. რეგლამენტი მიზნად ისახავს რძისა და რძის ნაწარმის, რძის შემცველი პროდუქტის წარმოების, გადამუშავების, დისტრიბუციის ეტაპებზე რეგულირების ერთიანი პრინციპების განსაზღვრას და მომხმარებელთა უფლებების დაცვას.

[თაკო ფეიქრიშვილი, ახალციხე]