ახალციხეში დამატებით 19 სათვალთვალო კამერა დამონტაჟდება

კამერების შესაძენად ახალციხის მერიამ ტენდერი დღეს, 18 თებერვალს 34 800 ლარზე გამოაცხადა. წინადადებების მიღება 20–დან 22-თებერვლამდე გაგრძელდება.

ახალი სათვალთვალო კამერები, ქალაქის ქუჩებში, საბარგო სადგურის ტერიტორიაზე, ასევე, სოფელ აწყურსა და წნისში დამონტაჟდება.

როგორც მერიაში განმარტავენ, ხელშეკრულების გაფორმების შემდეგ, კამერების განთავსების კონკრეტულ ადგილებს, მერია და შსს–ს ერთიანი ოპერაციების ცენტრი განსაზღვრავენ.

სატენდერო დოკუმენტების მიხედვით, ახალი კამერები შსს-ს ერთიანი ოპერაციის ცენტრში ჩაერთვება.

გასულ წელს, ახალციხის მერიამ 53 სათვალთვალო კამერა 81 257 ლარად შეიძინა.

„ამ კამერებით სწრაფად მოძრავი მანქანების ნომრების ამოცნობა იქნება შესაძლებელი. ჩვენი მიზანია, ვიზრუნოთ ჩვენი მოქალაქეების უსაფრთხოებაზე“, – ამბობს ახალციხის მერის მოადგილე რუბენ კარაპეტიანი.

როგორც მერიაში აცხადებენ, 19 კამერის შეძენის შემდეგ, თვითმმართველობა კამერების დამატებას აღარ გეგმავს.

რამდენი კამერაა რეგიონის ექვს მუნიციპალიტეტში ამ დროისათვის დამონტაჟებული და გამოვლინდა თუ არა მათი მეშვეობით დარღვევები, ამის შესახებ „სამხრეთის კარიბჭემ“ შინაგან საქმეთა სამინისტროდან ინფორმაცია წერილობით გამოითხოვა.

[ავთო ინასარიძე, ახალციხე]