„ახალციხის ციხეზე“, „ახალციხელობისადმი“ მიძღვნილი ღონისძიების ერთ-ერთი ნაწილი, საღამოს „საპატიო მოქალაქეების“ დასახელება იყო.
ქუჩისა და ონლაინ-გამოკითხვის ხმების დაჯამების შემდეგ, ქალაქის მერიამ საპატიო მოქალაქეობის 10 კანდიდატიდან სამი გამოავლინა.
8 ქალისა და 2 მამაკაცისაგან, ხმათა უმრავლესობით საპატიო მოქალაქეები თინათინ ჯაყელი, ნათელა იაძე და ლელა ნაროზაული გახდნენ.
„საპატიო მოქალაქები“ ქალაქის მერიამ, სიმბოლური საჩუქრებით დაჯილდოვა.
ნათელა იაძე 1944 წლის 24 იანვარს, ახალციხეში დაიბადა. დაამთავრა ახალციხის პირველი საჯარო სკოლა. 1963-65 წლებში მუშაობდა გაზეთ „წითელი დროშის“ რედაქციაში, კორექტორად.
1971 წელს ჩააბარა ლენინგრადის კულტურის ინსტიტუტში კულტურულ-საგანმანათლებლო მუშაობის ორგანიზატორის ფაკულტეტზე.
1965 -1995 წლებში ახალციხის კულტურის სახლში სამხატვრო ხელმძღვანელი იყო, 1995-2005 წლებში კი ახალციხის კულტურის სამსახურის უფროსი.
ამბობს, რომ 1995 წლიდან არის ახალციხელობის დღესასწაულის დაარსების იდეის ავტორია.
ჰყავს მეუღლე და სამი შვილი.
ლელა ნაროზაული 1945 წლის 8 მარტს, არხოტში დაიბადა. 1968 წელს დაამთავრა თბილისი სერგო ზაქარიაძის სახელობის სამუსიკო სასწავლებელი, რის შემდეგაც სამუშაოდ ახალციხეში, კულტურის სახლში გადმოვიდა.
წლების განმავლობაში ჰქონდა გახსნილი ფოლკლორის წრეები, სადაც ახალგაზრდებს სალამურზე, ჩონგურსა და ფანდურზე დაკვრას ასწავლიდა.
ამჟამად არის ვალის სამრევლო სკოლის და ახალციხის სასულიერო სემინარიის პედაგოგი.
თინათინ ჯაყელი 1952 წლის 28 ნოემბერს, ჩოხატაურის სოფელ დაბლაციხეში დაიბადა. 1975 წელს დაამთავრა ივანე ჯავახიშვილის სახელობის თბილისის სახლელმწიფო უნივერსიტეტი, ეკონომიკის ფაკულტეტი.
1975 წელს იყო ჩოხატაურის ბანკის ეკონომისტი. 1976-1989 წლებში ენგურჰესის მშენებლობასა და საქჰიდრომშენში მუშაობდა სხვასხვა თანამდებობებზე.
1993 წლიდან მუშაობდა კერძო სექტორში, ამერიკულ-ქართული ორგანიზაციის მენეჯერად. 2004 წლიდან დღემდე თანამშრომლობს სხვასხვა დიასპორებთან.
2005 წლიდან არის სასტუმრო სახლის „საქართველოს“ მეპატრონე და დირექტორი. 2012 წლიდან არის ფონდ „ჩვენებურების“ ერთ-ერთი დამფუძნებელი .
თინათინ ჯაყელი მიმდინარე წელს, ახალციხეში, სინაგოგის 275 წლის იუბილესადმი მიძღვნილი ღონისძიების ერთ-ერთი ორგანიზატორი იყო.
ჰყავს ორი შვილი და 4 შვილიშვილი.
შეგახსენებთ, რომ საპატიო ახალციხელის სტატუსი პირველად 2004 წელს, ახალციხის, ტაო-კლარჯეთის და ლაზეთის ეპისკოპოსს მეუფე თეოდორეს მიენიჭა.
საპატიო მოქალაქის სტატუსის მინიჭების ტრადიცია 2013 წელს, მაშინდელი საკრებულოს თავმჯდომარის, ოლეგ სანდროშვილის ინიციატივით აღდგა. ამ წელს ეს ტიტული კომპოზიტორ ვაჟა აზარაშვილს, გიტარისტ თემურ ყვითელაშვილსა და რეჟისორ თემურ ჩხეიძეს მიენიჭა.
2014 წელს საპატიო ახალციხელის წოდება ერგოთ: ქალაქ ვალეს ღვთისმშობლის სახელობის ეკლესიის დეკანოზს მამა სტეფანეს, ახალციხის კულტურის სამსახურის ყოფილ უფროსსა და სუხიშვილების ყოფილ მოცეკვავეს ვახტანგ კვესელაძეს და ჯაყელების გვარის შთამომავალს ომარ ჯაყელს.
2015 წელს კი საპატიო ახალციხელებად სამცხე-ჯავახეთის სახელმწიფო უნივერსიტეტის რექტორი მერაბ ბერიძე, სახალხო მთქმელი ვასილ კვინცხაძე და წლების განმავლობაში ახალციხის კულტურის განყოფილების ხელმძღვანელი ელგუჯა კოპაძე დასახელდნენ. ეს იყო პირველი წელიწადი, როდესაც საპატიო მოქალაქეების შერჩევა მერიამ მოქალაქეებს მიანდო.
ახალციხეს ამდრომდე სულ 10 „საპატიო ახალციხელი“ ჰყავდა, ათივე მათგანი მამაკაცი. მათ სიას წელს სამი ქალი დაემატა.
[ლუბა გიორგაძე ახალციხე]