რის მიხედვით შეარჩიეს 'ახალციხის საპატიო მოქალაქეები'

30 ივნისს, „ახალციხელობისადმი“ მიძღვნილი კულტურული ღონისძიებების დასასრულს, "ახალციხის საპატიო მოქალაქეები" წარადგინეს. ეს წოდება ქალაქ ვალეს ღვთისმშობლის სახლეობის ეკლესიის დეკანოზს მამა სტეფანე – ნადირაძეს, ვახტანგ კვესელაძესა და ომარ ჯაყელს ერგოთ.

"საპატიო მოქალაქეები" სამცხე–ჯავახეთის გუბერნატორმა აკაკი მაჭუტაძემ, ახალციხის მერმა გიორგი კოპაძემ და ახალციხის მუნიციპალიტეტის გამგებლის მოვალეობის შემსრულებელმა მალხაზ ჟუჟუნაძემ დააჯილდოვეს.

ახალციხის კულტურის სამსახურში განმარტავენ, რომ "საპატიო მოქალაქის" წოდების მინიჭებისთვის კრიტერიუმები არ არსებობს. მამა სტეფანეს, ომარ ჯაყელსა და ვახტანგ კვესელაძეს "ახალციხის საპატიო მოქალაქის" წოდება კულტურის სამსახურის, ახალციხის მუნიციპალიტეტის გამგეობისა და საკრებულოს წევრების ერთობლივი გადაწყვეტილებით მიენიჭათ.

„ახალციხის საპატიო მოქალაქეების" წოდების მისანიჭებლად რამდენიმე კანდიდატს დამსახურების მიხედვით განვიხილავდით. საბოლოოდ, ამ სამ პიროვნებზე შევჩერდით. თითოეულ მათგანს დიდი დამსახურება აქვს“, – ამბობს ახალციხის კულტურის სამსახურის სპეციალისტი მარინა ჯინჭველაძე.

მამა სტეფანე ვალეს ღვთისმშობლის სახელობის ტაძრის წინამძღვარია. წირვა–ლოცვას წმინდა მარინეს სახელობის ტაძარშიც აღავლენს.

„მას დიდი წვლილი მიუძღვის ახალციხეში პირველი მართმადიდებლური ტარძის წმინდა მარინეს ეკლესიის აღდგენა – ფუნქციონირებაში. 80–იან წლებში ტაძარში განთავსებული ყოფილა საწყობი. მამა სტეფანემ საკუთარი ხელით გაასუფთავა ტაძარი, რის შემდეგადაც წმინდა მარინეს ტაძარში წირვა–ლოცვა დღემდე აღევლინება“, – განმარტავენ კულტურის სამსახურში.

ომარ ჯაყელმა საფუძველი ჩაუყარა ახალციხეში ამაღლების სახელობის ტაძრის მშენებლობას. ჯაყელების შთამომავალი დღემდე გულშემატკივრობს ხელოვან ადამიანებს. მისი ინიციატივით, ყოველ წელს ახალციხეში ჯაყელების გვარის შეხვედრები ეწყობა, რათა არ გაწყდეს ახალციხესთან მათი ურთიერთობა. ის ასევე იყო ანსამბლ „მესხეთის“ ყოფილი წევრი.

რაც შეეხება, მესამე "ახალციხის საპატიო მოქალაქეს", სუხიშვილების ყოფილი მოცეკვავე ვახტანგ კვესელაძე ახალციხის კულტურის სამსახურში დირექტორად 45 წელიწადი მუშაობდა.

„50 წელი ღირსეულად იდგა სცენაზე. მისი ინიციატივით ახალციხეში ჩამოყალიბდა პირველი დასი, რომელსაც მიენიჭა „სატირისა და იუმორის დასის“ სახელი. დასმა შემოიარა თითქმის მთელი ევროპა. ვახტანგ კვესელაძეს მიღებული აქვს უამრავი ჯილდო იგი არის კულტურის დამსახურებული მუშაკი და ღირსების ორდენის კავალერი“, – ამბობენ კულტურის სამსახურში.

[მანანა სარაშვილი, ახალციხე]