სიახლეები ერთიან ეროვნულ გამოცდებში

საგამოცდო ცენტრი ახალციხეში #5–ე საჯარო სკოლაში განთავსდა. პირველი გამოცდა, ქართული ენისა და ლიტერატურაში, ხვალ, 1 ივლისს, დილის 09:00 საათზე დაიწყება.

2016 წელს, ერთიან ეროვნულ გამოცდებში შესული გარკვეული ცვლილებების გასაცნობად, ,,სამხრეთის კარიბჭე“ შეფასებისა და გამოცდების ეროვნულ ცენტრს დაუკავშირდა.

მათი ინფორმაციით, მიმდინარე წელს, აბიტურიენტებისათვის რამდენიმე სიახლეა. კერძოდ: გამოცდაზე მისულ აბიტურიენტს თან პირადობის მოწმობა და საგამოცდო ბარათი უნდა ჰქონდეს, რომელიც თავად უნდა ამობეჭდოს შეფასებისა და გამოცდების ეროვნული ცენტრის ვებ–გვერდიდან.

"ადრე ჩვენ ვუგზავნიდით ამ ბარათებს რესურსცენტრებს, შემდეგ ისინი გადასცემდნენ სკოლებს და სკოლები აწვდიდნენ აბიტურიენტებს. ახლა თითოეული კანდიდატი, ვინც დარეგისტრირდა გამოცდებზე, უნდა შევიდეს თავის გვერდზე, სადაც რეგისტრაცია გაიარა და ამოიბეჭდოს მოსაწვევევი. ეს იქნება A4 ფორმატის გვერდი და ამ ბარათს პირადობის მოწმობასთან ერთად წარადგენს გამოცდაზე მისვლისას“, – განმარტავს შეფასებისა და გამოცდების ეროვნული ცენტრის დირექტორის მოადგილე ივა მინდაძე.

მისივე თქმით, თუკი აბიტურიენტს აღნიშნული მოსაწვევი არ ექნება, მისი რეგისტრაციის პროცესი გაჭიანურდება, რადგან მის გადამოწმებასა და ბაზაში შედარებას დრო დასჭირდება.

კიდევ ერთი სიახლე, ტესტირების ელექტრონული ნაწილი იქნება. თითოეული ტესტირების საკითხთა ნაწილს აბიტურიენტები სპეციალურ ლეპტოპზე ჩააბარებენ.

საერთო ჯამში, ქვეყნის მასშტაბით, საგამოცდო ცენტრებში 10 000–ზე მეტი ლეპტოპი გადანაწილდა. მათი რაოდენობა, აბიტურიენთა რაოდენობის მიხედვით განისაზღვრა.

„ელექტრონული ნაწილი ყველა საგანში იქნება. აბიტურიენტებს ლეპტოპები მაგიდებზე დახვდებათ, დავალებას ნახავენ ეკრანზე და პასუხს ჩაწერენ პასუხების ფურცელზე. 30 ივნისს, ტექნიკური მხარე, ქსელების გამართვა – გადამოწმება და ა.შ საბოლოოდ შემოწმდება“, – ამბობს ივა მინდაძე.

შეფასებისა და გამოცდების ეროვნული ცენტრის ინფორმაციით, სხვადასხვა საგანში მაქსიმალური ქულა განსხვავებულია. გამსვლელი ბარიერი უმრავლეს გამოცდაში 25%–ია, მხოლოდ უცხო ენაში კი გამოცდის ჩასაბარებლად აბიტურიენტმა მინიმუმ 21 ქულა ანუ 20%+1 უნდა დააგროვოს.

ერთიანი ეროვნული გამოცდები 21 ივლისს, ფიზიკისა და სახვითი და გამოყენებითი ხელოვნების გამოცდებით დასრულდება.

წელს ზაფხულის გამოცდებს 38 500–ზე მეტი აბიტურიენტი, 4–ათასამდე სტუდენტი, 12 500–ზე მეტი მაგისტრობის მსურველი და 22 700–ზე მეტი პედაგოგი აბარებს.

[თაკო ფეიქრიშვილი, ახალციხე]