უცხო ენების და მათემატიკის გამოცდის პასუხები აგვისტოს დასაწყისში გამოქვეყნდება

"შესაძლოა, 31 ივლისსაც დაიდოს უცხო ენების გამოცდის პასუხები, ამის შემდეგ მალევე გამოქვეყნდება მათემატიკის გამოცდის შედეგებიც", - განმარტავს გამოცდების და შეფასების ეროვნული ცენტრის დირექტორის მოადგილე, ივა მინდაძე.

მისი თქმით, გამოცდების ეროვნული ცენტრი ყველა გამოცდის პირველადი შედეგების გამოქვეყნებას მიმდინარე წლის 5 აგვისტომდე გეგმავს.

მას შემდეგ რაც, გამოცდების პირველადი შედეგები გახდება ცნობილი აპელაციის პროცესი დაიწყება.

შეგახსენებთ, შეფასებისა და გამოცდების ეროვნულმა ცენტრმა ერთიანი ეროვნული გამოცდების შედეგების გამოცხადება გუშინ, 27 ივლისს დაიწყო. გუშინ ზოგადი უნარების გამოცდის შედეგი გამოქვეყნდა. შედეგების მიხედვით გამოცდებს 5000-მდე აბიტურიენტი გამოეთიშა.

გამოცდების ეროვნული ცენტრის ცნობით, ერთიან ეროვნულ გამოცდებზე წელს 41 200-მდე აბიტურიენტი იყო დარეგისტრირებული, თუმცა, ნაწილი გამოაკლდა იმის გამო, რომ გამოსაშვებ გამოცდებზე ერთ-ერთ საგანში მაინც ვერ გადალახეს მინიმალური ბარიერი. საბოლოოდ, გამოცდებში დაახლოებით 39 000-მდე აბიტურიენტი მონაწილეობდა. მათგან 3% გამოცდაზე არ გამოცხადდა.

[sknews.ge]