ვანო მერაბიშვილის განცხადებას დავით ნარმანია გამოეხმაურა

საგანგებო ბრიფინგი ვანო მერაბშვილმა დღეს პარტიის ცენტრალურ ოფისში გამართა. მისი განცხადებით, ქვეყანაში არსებულ კრიზისს სამი მიზეზი აქვს: ბიზნესების შევიწროვება, ინფრსატრუქტურული პროექტების შეჩერება და ერთიანი მკაფიო ეკონომიკური მოქმედების გეგმის არარსებობა.
მისი თქმით, მიმდინარეობს ბიზნესის მასობრივი შემოწმება საგადასახადო ინსპექციის, ფინანსური პოლიციისა და პროკურატურის და შინაგან საქმეთა სამინისტროს მიერ. გარდა ამისა, შეჩერდა ძალიან ბევრი მნიშვნელოვანი ინფრასტრუქტურული პროექტი, რამაც უმუშევრობის ზრდა და ბიუჯეტში შემოსავლების კლება გამოწვია. საბიუჯეტო კრიზისის ერთ-ერთ მიზეზად მერაბიშვილი ეკონომიკური გეგმის არაარსებობასაც ასახელებს.

”ამ კრიზისის შენიღბვის მიზნით, დღევანდელმა მთავრობამ ძველი, 2003 წლამდე, შევარდნაძის ეპოქაში არსებული ძველი პრაქტიკა, გადასახადების წინასწარ გადახდა, აღადგინა. გადასახადების წინასაწარ გადახდა მასობრივად დაიწყო. კომპანიებს დეკემბერში ახდევინებდნენ იანვარში გადასახადელ გადასახადებს, რაც ძალიან სავალალო მდგომარეობადე მიგვიყვანს", - აღნიშნა მერაბიშვილმა.

ერთიანი ნაციონალური მოძრაობის გენერალური მდივნის განცხადებას დღესვე გამოეხმაურა რეგიონული განვითარებისა და ინფრასტრუქტურის მინისტრი დავით ნარმანია. მისი განცახდებით, პროექტების თვალსაზრისით 2013 წელი დატვირთული იქნება და იმაზე მეტი ადამიანი დასაქმდება, ვიდრე 2012 წელს იყო დასაქმებული.

”2013 წელს ჩვენი სამინისტროს მიერ, პროექტების გახორციელების კუთხით 180 მილიონი ლარით მეტი დაიხარჯება, ვიდრე 2012 წელს დაიხარჯა. გარდა ამისა, 2012 წელს დაწყებული ყველა გარდამავალი პროექტი აუცილებლად გაგრძელდება 2013 წელს. ასევე, საქართველოს 25-მდე მუნიციპალიტეტში ინიცირებულია წყალმომარაგების რეაბილიტაციის პროექტები. გახორციელდება დასავლეთ-აღმოსავლეთ მაგისტრალის დამატებითი მონაკვეთების მშენებლობა”, - განაცხადა ნარმანიამ.
მოსალოდნელ უმუშევრობის ზრდასა და საბიუჯეტო კრიზისს ნარმანია კატეგორიულად გამორიცხავს.

”საზოგადოების ინფორმირებულობის გამჭვირვალეობიდან გამომდინარე, წინასწარ ვაქვეყნებთ ინფორმაციას 2013 წლის სამოქმედო გეგმის შესახებ. - განაცხადა დავით ნარმანიამ.

მინისტრი საზოგადოებას 2013 წელს გასახორციელებელი ინფრასტრუქტურული პროექტების შესახებ დეტალურ ინფორმაციას ხვალისთვის დაგეგმილ პრესკონფერენციაზე მიაწვდის, რომელიც რამდენიმე დღის წინ დაიგეგმა. მერაბიშვილი კი აცხადებს, რომ ეკონომიკური კრიხისის თემაზე პარტია მუშაობს და 22 იანვარს საზოგადოებას ბოლო სამი თვის განმავლობაში ქვეყნის ეკონომიკის შესახებ ზუსტ რიცხვებს მიაწვდის.

[ნინო ნარიმანიშვილი, ახალციხე]