ბორჯომის მუნიციპალიტეტში ინფრასტრუქტურის მოწესრიგებას 5 მილიონი ლარი მოხმარდება

აღნიშნული თანხით მუნიციპალიტეტში რამდენიმე პროექტი ხორციელდება: იგება გზები, მიმდინარეობს ნაპირდამცავი სამუშაოები, წესრიგდება საკანალიზაციო სისტემა, მიმდინარეობს მოედნების რეაბილიტაცია, დაბა ბაკურიანში იწყება სახანძრო-სამაშველო სამსახურის შენობის მშენებლობა, უკვე დასრულდა დაბა ახალდაბის გზის რეაბილიტაცია.

„ბორჯომის მუნიციპალიტეტი, რომელიც მნიშვნელოვან საკურორტო ზონას წარმოადგენს, ჩვენთვის ერთ-ერთი პრიორიტეტული მუნიციპალიტეტია,“ - აცხადებს საქართველოს რეგიონული განვითარებისა და ინფრასტრუქტურის მინისტრი დავით ნარმანია, - „წელს აქ, ერთობლივად, რამდენიმე პროექტი ხორციელდება: წესრიგდება საგზაო და წყალმომარაგების ინფრასტრუქტურა. ამით პრობლემების მნიშვნელოვანი ნაწილი მოგვარდება, ხოლო დარჩენილ ნაწილს მომდევნო წელს რეგიონებში განსახორციელებლი პროექტების ფონდის განაწილების დროს გავითვალისწინებთ, რათა 2014 წლის ბოლოსთვის, პრაქტიკულად, არცერთი ქუჩა არ დაგვრჩეს ბორჯომში, სადაც არ იქნება ასფალტის საფარი, ტროტუარი და სხვა მნიშვნელოვანი ადგილი, რომელიც ყურადსაღებია საკურორტო ტერიტორიისთვის - მოუწესრიგებელი“.

ბორჯომის მუნიციპალიტეტის გამგებლის დიმიტრი ბერიძის განცხადებით, ინფრასტრუქტურული პროექტები მუნიციპალიტეტში გეგმის მიხედვით ხორციელდება.

„ამ დროისთვის მიმდინარეობს „ბორჯომ-პარკის“, 9 აპრილის სკვერისა და მიმდებარე ტერიტორიების რეაბილიტაცია, რაც, მოსახლეობისთვის კომფორტის შექმნის გარდა, მიზნად ტურისტების მოზიდვას ისახავს. უმოკლეს ვადებში, დასრულდება ტენდერები დანარჩენ პროექტებზეც და სამუშაოები კიდევ უფრო გაიშლება,“ - განაცხადა დიმიტრი ბერიძემ.

ბორჯომში ინფრასტრუქტურული პროექტები მომდევნო წელსაც დაფინანსდება.

საქართველოს რეგიონული განვითარებისა და ინფრასტრუქტურის მინისტრმა დავით ნარმანიამ და მუნიციპალიტეტის გამგებელმა დიმიტრი ბერიძემ ბორჯომის მუნიციპალიტეტში მიმდინარე ინფრასტრუქტურული სამუშოები გუშინ, 4 ოქტომბერს დაათვალიერეს.

[sknews.ge]