ვალეში საბავშვო ბაღს გაარემონტებენ

ქალაქ ვალეში ერთადერთი სკოლამდელი აღზრდის დაწესებულების რეაბილიტაცია წლის ბოლომდე უნდა დასრულდეს. სარეაბილიტაციო სამუშაოებისთვის დაახლოებით 550.000 ლარია გათვალისწინებული.

მანამდე ვიდრე, შენობის რეაბილიტაცია დაიწყება, საპროექტო–სახარჯთაღრიცხვო დოკუმენტაცია უნდა მომზადდეს. აღნიშნულისთვის კი ადგილობრივი ბიუჯეტიდან 15.000 ლარი დაიხარჯება. სამუშაოებს შპს „მესხმშენპროექტი“ განახორციელებს.

ვალეს საბავშვო ბაგა–ბაღში 150 აღსაზრდელი ირიცხება. ქალაქის გარდა ბავშვები სოფელ ვალედანაც დადიან.

ახალციხის თემის სკოლამდელი აღზრდის დაწესებულებათა გაერთიანების ხელმძღვანელის ლელა ზაზაძის განმარტებით, შენობის სარეაბილიტაციო სამუშაოები საზაფხულო არდადეგებს დაემთხვევა.

„სამუშაოების არდადეგების შემდეგაც გაგრძელდება. თუ მშობლების მოთხოვნა იქნება, ბავშვებს სხვილისისა და მეროე შახტის ბაღში გადავანაწილებთ, სხვა შემთხვევაში ალტერნატიულ ფართსაც მოვძებნით“, – ამბობს ლელა ზაზაძე.

მისი თქმით, რეაბილიტაციის შემდეგ გაცილებით მეტი რაოდენობის აღსაზრდელის მიღებას შეძლებენ.

[თინათინ ზაზაძე, ახალციხე]