ვინ ლიდერობს ‘საპატიო ახალციხელობის’ კანდიდატებში

გამოკითხვა ორ ეტაპად მიმდინარეობს, ქუჩაში და ინტერნეტ სივრცეში. ონლაინ–გამოკითხვის მიხედვით, 10–კაციან სიაში თინათინ ჯაყელი, ნათელა იაძე და ნუნუ აბდუშელიშვილი ლიდერობენ.

ონლაინ სივრცეში გამოკითხვა 7 ივნისს დაიწყო. 24 ივნისს მერიამ გაავრცელა ინფორმაცია, რომ აპლიკაციას პრობლემა შეექმნა და ახალი აპლიკაცია შეიქმნა. "თქვენს მიერ მიცემული ხმა არ გაუქმებულა და დაგროვილ ხმათა რაოდენობამ გადმოინაცვლა ახალ აპლიკაციაში", – განაცხადეს მერიაში.

გამოკითხვის თავდაპირველ ვერსიაში, 23 ივნისის მონაცემებით, 1154 ხმა იყო დაფიქსირებული და შედეგებიც დღევანდელი შედეგებისგან განსხვავებული იყო. ახალ აპლიკაციაში, რომელიც 25 ივნისიდანაა გააქტიურებული, 28 ივნისის 14:00 საათის მონაცემებით, 335 ხმაა დაფიქსირებული.

ახალციხის მერიაში ამბობენ, რომ გამოკითხვის პირველი აპლიკაციის შედეგები შენახულია და როდესაც ახალი აპლიკაციითაც დამთავრდება გამოკითხვა, ამ ორივე შედეგს შეაჯამებენ და საბოლოო შედეგს ისე დაადგენენ.

როგორც ახალციხის მერიაში აცხადებენ, ხმის მიცემის პროცესი 29 ივნისს შეწყდება.

ონლაინ გამოკითხვის გარდა, მერიაში ამბობენ, რომ გამოკითხვას აწარმოებენ ქუჩაშიც. მერიაში ირწმუნებიან, რომ მათ აქვთ გამოკითხვის ფურცლები და თითოეულ მოქალაქეს ავსებინებენ. მიუხედავად სურვილისა, მერიის საზოგადოებასთან ურთიერთობის სამსახურში "სამხრეთის კარიბჭეს" ეს ფურცლები არც აჩვენეს და არც გადააღებინეს, არც უკვე შევსებული და არც ჯერ შეუვსებელი, გამოკითხვის ცარიელი ანკეტა.

შეგახსენებთ, ახალციხემ საპატიო მოქალაქედ პირველად, 2004 წლის 30 ივნისს ახალციხის, ტაო-კლარჯეთის და ლაზეთის ეპისკოპოსი მეუფე თეოდორე დაასახელა. საპატიო მოქალაქეების შერჩევის ტრადიცია, ოფიციალურად, 2013 წლიდან დამკვირდა. ყოველ წელს, „ახალციხელობის“ დღესასწაულზე, სამ საპატიო მოქალაქეს ირჩევენ.

ახალციხეს უკვე ჰყავს 10 საპატიო მოქალაქე, 10–ვე მათგანი მამაკაცია. წელს კანდიდატების სიაში ქალები ლიდერობენ. 2016 წლის საპატიო ახალციხელებს 8 ქალისა და 2 მამაკაცისგან შემდგარი სიიდან არჩევენ.

[ლუბა გიორგაძე, ახალციხე]