ახალციხე სახელობითი დღესასწაულისთვის ემზადება

"ახალციხელობა“ ყოველი წლის 30 ივნისს, წმინდანისა და ეროვნული გმირის, შალვა ახალციხელის ხსენების დღეს აღინიშნება.

სახელობით დღესასწაულზე დაგეგმილი ღონისძიებების პროგრამა უკვე ცნობილია. გასული წლების მსგავსად, მიმდინარე წელსაც, "ახალციხელობას" სხვადასხვა ღონისძიება მიეძღვნება.

18:00 საათიდან ისტორიულ კომპლექსში არსებულ სცენაზე, ადგილობრივი ფოლკლორული ანსამბლების მონაწილეობით, მცირე, დაახლოებით ერთ საათიანი კონცერტი გაიმართება, რის შემდეგაც, სპორტულ შეჯიბრებებში გამარჯვებულებს დაჯილდოებენ.

ღონისძიების შემდეგი ეტაპი, უკვე ტრადიციად ქცეული, საპატიო ახალციხელების დასახელება იქნება. ადგილობრივების მიერ შერჩეულ კანდიდატებს, ქალაქის თვითმმართველობა ტიტულს ოფიციალურად მიანიჭებს.

20:00 საათზე დღის დასკვნითი ნაწილი დაიწყება. სცენას თბილისიდან ჩამოსული მომღერლები დაიკავებენ. კულტურის სამინისტროს ინიციატივით, გალა –კონცერტში მონაწილეობას მიირებენ მომღერლები: თემურ ყვითელაშვილი, სოფო ბედია, ბორის ბედია და ანსამბლი "შვიდკაცა“, ასევე ქორეოგრაფული ანსამბლი "სუხიშვილები“.

საღამოს ფეიერვერკი დაასრულებს.

"ახალციხელობა" ადგილობრივი თვითმმართველობის ორგანიზებით იმართება. რაც შეეხება დასკვნით საღამოს, რომელიც ესტრადის მომღერლების მონაწილეობას გულისხმობს, კულტურის სამინისტრო აფინანსებს.

[თაკო ფეიქრიშვილი, ახალციხე]