”ახალციხელობა 2012”

სახალხო დღესასწაული “ახალციხელობა” მეშვიდე წელია მასშტაბურად აღინიშნება. დღესასწაული ტრადიციულად 30 ივნისს, წმინდანისა და ეროვნული გმირის შალვა ახალციხელის ხსენების დღეს იმართება.

ახალციხის სახელმწოფო სასწავლო უნივერსიტეტის ეზოში მდებარე, წმინდანის სახლობის მშენებარე ტაძარში ახალციხისა და ტაო-კლარჯეთის მიტროპოლიტმა მეუფე თეოდორემ წმინდანის სახელზე პარაკლისი გადაიხადა და ყველა ახალციხელს ”ახალციხელობა” მიულოცა.

წლების განმავლობაში ”ახალციხელობა” ტრადიციულად რაბათში, სამცხე-ჯავახეთის ისტორიული მუზეუმის მიმდებარე ტერიტორიაზე იმართებოდა. მუნიციპალიტეტის სხვადსხვა სოფლებიდან ჩამოსული მოსახლეობა ტრადიციულ მესხურ კერძებსა და ხალხური რეწვის ნიმუშებს წარმოადგენდნენ. იმართებოდა სხვადასხვა სპორტული და კულტურული ღონისძიებები.

წელს ექვსწლიანი ტრადიცია შეიცვალა და ამჯერად გასართობი ღონისძიებები ახალციხე-ახალქალაქის გზატკეცილზე მდებარე ხელოვნური ტბის ამფითეატრში ქართული ესტრადის ვარსკვლავების კონცერტით აღინიშნება. კონცერტი საღამოს ცხრა საათზე დაიწყება და ამ ღონისძიებით ხელოვნური ტბა ოფიციალურად გაიხსნება.

[თამარ თოთაძე, ახალციხე]