ქეთევან ხმალაძის საქმის არსებითი განხილვა იწყება

დღეს, 13 ივნისს ნინოწმინდაში მომხდარი მკვლელობისა და ყაჩაღობის საქმეზე წინა სასამართლო სხდომა გაიმართა. პროკურორი ვასილ ოსიძე სასამართლოში გამოსაკვლევი მტკიცებულებების ნუსხას თითქმის ნახევარი საათის განმავლობაში კითხულობდა. ბრალდების მხარის დასაკითხ მოწმეთა სიაში 69 პირია წარმოდგენილი. თუმცა, პროკურორი ამბობს, რომ შესაძლოა ყველა მათგანის დარბაზში ჩვენების მიცემა საჭირო არც გახდეს.

პროკურორის შემდეგ მტკიცებულებები დაცვის მხარემ წარმოადგინა. მხარეებმა ერთმანეთის თითქმის ყველა მტკიცებულება სადავო გახადეს.
ამის შემდეგ, სასამართლომ, უკვე მეოთხედ, აღკვეთის ღონისძიებად პატიმრობის ძალაში დატოვების საკითხი განიხილა. გარდა, ერთი ბრალდებულისა, რომელსაც აღკვეთის ღონისძიებად პირველივე სხდომაზე გირაო შეეფარდა, ყველას ადვოკატმა პატიმრობაში მყოფი ბრალდებულის გირაოს სანაცვლოდ გათავისუფლება ითხოვა.

„გირაოს 30 000–ს გადავიხდი. არსად წასვლა არ დამიპირებია და არც დავაპირებ. ოთხი წელი ვმოღვაწეობდი ახალციხეში და შეგიძლიათ ნახოთ Youtube-ზე ჩემს შესახებ მომზადებული მასალები, რომ ხალხისთვის საშიში არ ვარ. დუმილის უფლებას ვიყენებ და ამას ჩემ საწინააღმდეგოდ ნუ გამოიყენებთ“, – განაცხადა სასამართლო სხდომაზე ქეთევან ხმალაძემ და დაამატა, რომ ბრალს არ აღიარებს.
ბრალს არ აღიარებს დანარჩენი ხუთი ბრალდებულიც. მათ შორის მხოლოდ ერთი ნოდარ ა. ამბობს, რომ თავს ნაწილობრივ ცნობს დამნაშავედ.

მოსამართლე გიორგი ლონდარიძემ ბრალდებულებს აღკვეთის ღონისძიებად კვლავ პატიმრობა დაუტოვა.

„სისხლის სამართლის საპროცესო კოდექსში განხორციელებული ცვლილებების შემდეგ, კანონმდებლობა თვალისიწინებს, რომ ყოველ ორ თვეში ერთხელ იმსჯელოს სასამართლომ აღკვეთის ღონისძიების საკითხზე. დღეს ეს სასამართლომ უკვე მეოთხედ იმიტომ განიხილა“, – განაცხადა პროკურორმა ვასილ ოსიძემ პრესასთან პროცესის დასრულების შემდეგ.

კანონში შეტანილ ამ ცვლილებას ხმალაძის ადვოკატი ირაკლი ბარძიმაძე ფარსს უწოდებს და ამბობს, რომ ამისთვის ჯერ ქართული მართლმსაჯულება მზად არ არის და სასამართლო ყოველ ორ თვეში ერთხელ აღკვეთის ღონიძიების საკითხს მხოლოდ იმიტომ იხილავს, რომ ეს კანონში წერია.

შეკითხვაზე, ბრალდების მხარისგან განსხვავებული მტიცებულებები თუ აქვს დაცვის მხარეს საქმეში, ბარძიმაძე გვპასუხობს: „ბუნებრივია ამას ახლა აქ ვერ მოგიყვებით“.

მომავალი სასამართლო სხდომა 24 ივნისს 14:00 საათზე ჩაინიშნა. სასამართლო შესავალ სიტყვებს მოისმენს და მოწმეების დაკითხვა დაიწყება.
შეგახსენებთ, ნინოწმინდაში მომხდარი მკვლელობის საქმეზე ჯგუფურ ყაჩაღობაში ბრალდებით ქეთევან ხმალაძე ხუთ პირთან ერთად 16 იანვარს დააკავეს.18 იანვარს ერთ–ერთი დაკავებული გირაოს სანაცვლოდ გაათავისუფლეს.

[თამუნა უჩიძე, ახალციხე]