ბრალდებული ქეთევან ხმალაძე შიმშილობის დაწყებას აპირებს

დღეს, 13 აპრილს, ახალციხის რაიონულმა სასამართლომ, ნინოწმინდაში მომხდარი ყაჩაღობისა და მკვლელობის საქმეში ბრალდებულების აღკვეთის ღონისძიებად პატიმრობაში დარჩენის საკითხზე, მეორედ იმსჯელა. მიზეზი ისაა, რომ საქმეზე წინა სასამართლო სხდომა გადაიდო, პროცესი 19 აპრილის ნაცვლად 18 მაისს გაიმართება. სხდომის გადადების გამო კი, 72 საათში სასამართლოს აღკვეთის ღონისძიების ძალაში დატოვების საკითხი ხელახლა უნდა განეხილა.

პროკურორმა ვასილ ოსიძემ განაცხადა, რომ ბრალდებულები პატიმრობაში უნდა დარჩნენ, რადგან მტკიცებულებების განადგურების, მოწმეებზე ზემოქმედებისა და მიმალვის საფრთხე არსებობს.

პროკურორს დარბაზში მხოლოდ ერთი ბრალდებული ივანე გ. დაეთანხმა: „როგორც იტყვით, ისე იყოს“.

სასამართლოს მიანდო გადაწყვეტილების მიღება ნოდარ ა–ს ადვოკატმა სულიკო ხიზანიშვილმა: „ახალი გარემოებები არაა, რაზეც შეიძლება იმსჯელო, როგორც თქვენ გადაწყვეტთ“.

სხვა ბრადლებულების ადვოკატებმა კი პატიმრობის ნაცლვად გირაოს შეფარდება ითხოვეს. თემურ ბ–ს და კობა შ–ს ადვოკატებმა განაცხადეს, რომ 50–50 ათასს გირაოს უზრუნველყოფენ.

რაც შეეხება ქეთევან ხმალაძეს, მისმა ადვოკატმა ირაკლი ბარძიმაძემ 20 ათასი ლარის გირაოზე იშუამდგომლა. მისივე განცხადებით, მიმდინარე პროცესისთვის საქმეში ახალი გარემოება არაა, წინა სხდომაზე კი განაცხადა, რომ ხმალაძე დაპატიმრების შემდეგ ავად გახდა. ამას სამედიცინო დოკუმენტები ადასტურებენ, ასევე იგი ყაჩაღობის ფაქტზე იძულებით წაიყვანეს და ესეც ექსპერტიზის დასკვნით დასტურდება, მისი დაცვცის ქვეშ მყოფს სხეულზე 10 დაზიანება აქვს. ბარძიმაძე ირწმუნება, რომ ხმალაძე მსხვერპლია და არა დამნაშავე.

თავად ხმალაძემ საკუთარი პოზიციის დაფიქსირებისას მედიას და სასამართლოს ერთად მიმართა: „არც გამქცევი ვარ და არც მიმმალავი. ვისზე უნდა მოვახდინო ზეწოლა, მოწმეზე, რომელიც ციხეში ზის?! თუ არ მომაქცევთ ყურადღებას, დღეიდან ვიწყებ შიმშილს. ჩემთან ერთად იშიმშილებენ ჩემი შვილი და მეუღლე“.

ხმალაძის განცხადებით, პროკურორმა ბრალი მხოლოდ ერთი მოწმის ჩვენებაზე ააგო: „მოგმართავთ, რომ დააკმაყოფილოთ მოთხოვნა გირაოზე, თორემ ასეთ სიცოცხლეს აზრი არ აქვს, მშრალ შიმშილობას ვიწყებ! გირაო არ ნიშნავს ბრალისგან გათავისუფლებას. გარეთ უნდა ვიყო, რომ მკურნალობა შევძლო, ჩემ შვილებთან მინდა ყოფნა და თუ სასამართლო გადაწყვეტს რომ დამნაშავე ვარ, ეს ხომარ ნიშნავს იმას, რომ უკან ვერ შემაბრუნებენ?!“

მოსამართლე გოჩა ჯეირანაშვილმა ხუთივე ბრლადებული პატიმრობაში დატოვა. მან აღკვეთის ღონისძიება არცერთს არ შეუცვალა. მისი განმარტებით, მათ ბრალი განსაკუთრებით მძიმე კატეგორიის დანაშაულის ჩადენაში ედებათ და არსებობს დასაბუთებული ვარაუდი, რომ მტკიცებულებების განადგურებას შეეცდებიან: „საქმის მასალების მიხედვით, დაზარალებულს უთვალთვალებდნენ, ერთად გეგმავდნენ რა როგორ უნდა გაეკეთებინათ, ამიტომ არის იმის საფრთხეც, რომ დაზარალებულზე ზეწოლას შეეცდებიან“.

შეგახსენებთ, რომ ნინოწმინდაში მომხდარი მკვლელობის საქმეზე ჯგუფურ ყაჩაღობაში ბრალდებით ქეთევან ხმალაძე ხუთ პირთან ერთად 16 იანვარს დააკავეს.18 იანვარს ერთ–ერთი დაკავებული გირაოს სანაცვლოდ გაათავისუფლეს.

[თამუნა უჩიძე, ახალციხე]