გამოსაშვებ გამოცდებში ჩაჭრილ მოსწავლეებს რეგისტრაციის თანხა დაუბრუნდებათ

2016 წელს, გამოსაშვები გამოცდებისთვის 47 000–მდე მოსწავლე იყო დარეგისტრირებული, მათგან ერთიან ეროვნულ გამოცდებზე გასვლას 41 600 აპირებდა, დანარჩენებს კი მხოლოდ ატესტატის აღების სურვილი ჰქონდათ.

საატესტატო გამოცდების შედეგად, ერთიან ეროვნულ გამოცდებზე გამსვლელმა 2 900–მდე მოსწავლემ სხვადასხვა საგანში ბარიერი ვერ გადალახა. შესაბამისად, ისინი ერთიან ეროვნულ გამოცდებზე გასვლას ვეღარ შეძლებენ. თუმცა რეგისტრაციისას გადახდილი თანხა უკან დაუბრუნდებათ.

ერთიანი ეროვნული გამოცდებისათვის თითოეულ ჩასაბარებელ საგანზე აბიტურიენტებმა 10 ლარი გადაიხადეს. იმისათვის, რომ თანხა აუნაზღაურდეთ, შეფასებისა და გამოცდების ეროვნულ ცენტრს განცხადებით უნდა მიმართონ. ცენტრის ინფორმაციით, 1 ივნისიდან გამოცხადდება ვადები, როცა კუთვნილი თანხის მისაღებად მოსწავლეებმა განაცხადი უნდა წარადგინონ.

[თაკო ფეიქრიშვილი, ახალციხე]