ჭაჭარაქში სეტყვამ ნერგები დააზიანა

ჭაჭარაქელების თქმით, სოფელში ძლიერი წვიმა და სეტყვა შუადღეს, 15:00 საათისათვის დაიწყო.

ნახევარსაათიანმა სეტყვამ, ადგილობრივებს ბოსტნეულის ნერგები მნიშვნელოვნად დაუზიანა. მათი თქმით, პომიდვრის, ბოლოკისა და წიწაკის ნერგები თავიდან აქვთ საყიდელი და დასარგავი.

„სულ ძირს არის დაწვენილი, უმეტესობა მოტეხილია, ახალი ნერგი თუ არ ვიყიდე, ეს აღარ გაიხარებს“, - ამბობს სოფელ ჭაჭარაქის მკვიდრი ჰერანუშ მინასიანი .

ადგილობრივების თქმით, სერიოზულად არ დაზიანებულა კარტოფილის ნათესები: „კარტოფილი მხოლოდ ფოთლებით დააწვინა ძირზე, გამოდგება და გაიხარებს, სერიოზული არაფერია“.

ჭაჭარაქში სეტყვას არ დაუზიანებია საცხოვრებელი სახლების სახურავი და ფანჯრები.

მდგომარეობის გასარკვევად სოფელ ჭაჭარაქში, საკრებულოსა და გამეგობის წარმომადგენლები იმყოფებოდნენ. თუმცა, როგორც ადგილობრივ თვითმმართველობაში ამბობენ, სეტყვისაგან მიყენებული ზიანი უმნიშვნელოა და მოსახლეობას სერიოზული ზარალი არ მისდგომია.



[ლუბა გიორგაძე, ახალციხე]