პროგრამა 'საქართველოს მოხალისე' რეგიონებში კონკურსს აცხადებს

მოხალისეების შერჩევის მიზნით, სამინისტრო კონკურსს ქვეყნის 10 რეგიონის 64 მუნიციპალიტეტში აცხადებს. მათ შორის არის სამცხე–ჯავახეთი. პროგრამის ფარგლებში თითოეული მუნიციპალიტეტიდან, 17-დან 25-წლამდე ასაკის 2 მოხალისე უნდა შეირჩეს.

კონკურსის პირველ ეტაპზე, ახალგაზრდებმა, 11– 31 მაისის ჩათვლით, რეგიონების მიხედვით უნდა შეავსონ სააპლიკაციო ფორმა ვებგვერდზე: http://youth.gov.ge/home შემდეგ საფეხურზე სააპლიკაციო ფორმების საფუძველზე შერჩეული კანდიდატები გადავლენ.

შერჩეული კანდიდატები 10–დან 14 ივნისის ჩათვლით, მოსამზადებელ ტრენინგ კურსებს გაივლიან, შემდეგ თემებზე:

• მოხალისეობა და მოხალისეების რეკრუტირება;
• კომუნიკაციის და პრეზენტაციის უნარ-ჩვევები;
• საჯარო ინსტიტუტებთან ურთიერთობის ფორმები;
• პროექტების წერა და ფონდების მოზიდვა;
• მოხალისეობის განხორციელებასთან დაკავშირებული სხვა საკითხები.

ტრენინგ კურსის დასრულებისას, თითოეულ მოხალისეს წლის ბოლომდე „საქართველოს მოხალისის" სტატუსი მიენიჭება.
პროგრამაში მონაწილე მოხალისეებს საშუალება ექნებათ:

• გაიარონ 5 დღიანი ტრენინგ-სემინარი;
• ყოველთვიურად მიიღონ საკომუნიკაციო ხარჯი 45 ლარის ოდენობით;
• მონაწილეობა მიიღონ სამინისტროს ეგიდით გამართულ სხვა ღონისძიებებში;
• ჩაერთონ საერთაშორისო მოხალისეობრივ პროექტებში (European Voluntary Service);
• მიიღონ მოხალისეობრივი პროექტების განხორციელებისთვის დაფინანსება;
• გამოვლინდნენ და დაჯილდოვდნენ წლის საუკეთესო მოხალისეები;

პროგრამის ფარგლებში შერჩეული მოხალისეები 2016 წლის ბოლომდე ადგილობრივი მუნიციპალიტეტის საჭიროებიდან და თავისებურებებიდან გამომდინარე რეგიონებში განახორციელებენ სხვადასხვა ინიციატივებს: მოხალისეთა კლუბის შექმნა, გარემოსდაცვითი ღონისძიებები, საქველმოქმედო საქმიანობა - სხვადასხვა საჭიროებების მქონე ადამიანების დახმარება, ფილმების ჩვენება, უცხო ენის კურსების გამართვა, ცხოვრების ჯანსაღი წესის პოპულარიზაცია (სპორტული შეჯიბრებები, მარათონები), შშმ ბავშვების ინტეგრაცია, ღირსშესანიშნავი თარიღების აღნიშვნა, შემოქმედებითი საღამოების გამართვა, ცნობილ ადამიანებთან შეხვედრები და სხვა.

პროგრამა "საქართველოს მოხალისეს" მიზანის მოხალისეობის ინსტიტუტის გაძლიერება, ქვეყნის მასშტაბით, ერთიანი ქსელის განვითარება და ახალგაზრდობაში სამოქალაქო ცნობიერების ამაღლება წარმოადგენს.

[sknews.ge]