2013 წელს ახალციხის ციხემ ვიზიტორებისგან ნახევარ მილიონამდე ლარი მიიღო

1 იანვრიდან ნოემბრის ბოლომდე ახალციხის ციხეს 127 698 ვიზიტორი ესტუმრა. ამათგან, 103 611 ადგილობრივი და 17 164 უცხოელი.

ახალციხის ციხის ადმინისტრაციის მიერ მოწოდებული ინფორმაციის თანახმად, ყველაზე მეტი ვიზიტორი ციხეს ივნისის და აგვისტოს თვეებში სტუმრობდა.

ივნისში ციხეს 39 128 მნახველი ჰყავდა, აქედან, 36 679 ადგილობრივი და 2449 უცხოელი. ივლისში მნახველთა რაოდენობამ 17 529-მდე დაიკლო, 14 137 ადგილობრივი და 3 392 უცხოელი, აგვისტოში კი ამ რიცხვმა - 23 670 შეადგინა. სექტემბრიდან მნახველების რაოდენობა იკლებს. ყველაზე ნაკლები ვიზიტორი ციხეს 2013 წლის თებერვალში ჰყავდა - 1 511, აქედან, 1 304 ადგილობრივი და 207 უცხოელი.

2013 წელს ვიზიტორებიდან ციხემ 451 861 ლარი მიიღო. ამას გარდა 42 410 ლარი მიიღო ციხემ გიდების მომსახურებითაც.

გასულ წელს, გახსნის დღიდან, 2012 წლის 16 აგვისტოდან დეკემბრის ბოლომდე, ციხეს 82 548 ვიზიტორი ჰყავდა. ყველაზე მეტი მნახველი ოქტომბერში დაფიქსირდა - 27 483, ყველაზე ნაკლები დეკემბერში - 2 171. რამდენი ადგილობრივი ტურისტი იყო და რამდენი უცხოელი, გასულ წელს, ციხეში, ეს ინფორმაცია ცალ-ცალკე არ აღურიცხავთ.

გასულ წელს ვიზიტორებისა და გიდების მომსახურებით ციხემ 242 190.50 ლარი მიიღო, 225 960.50 ლარი ვიზიტორებისგან და 16 230 გიდების მომსახურებით.

2012 და 2013 წლების ბოლო ხუთი თვის (აგვისტო-დეკემბერი) მონაცემებს თუ შევადარებთ, (შეგახსენებთ ციხე 2012 წლის აგვისტოდან ამოქმედა) წელს ვიზიტორების რაოდენობა დაკლებულია.

რაც შეეხება უცხოელ ტურისტებს, ახალციხის ციხეს 2013 წელს ყველაზე მეტი ვიზიტორი ისრაელიდან ესტუმრა. შემდეგ მოდის: პოლონეთი, თურქეთი, რუსეთი და უკრაინა.



[ნინო ნარიმანიშვილი, ახალციხე]