2015 წელს 611 არასრულწლოვანი პირის ქორწინება დარეგისტრირდა [ინფოგრაფიკა]

ანგარიშის მიხედვით, 2015 წელს 611 არასრულწლოვანი პირის ქორწინება დარეგისტრირდა. თითქმის სამჯერ მეტია მონაცემები, რომლებიც ბავშვის რეგისტრაციის მომენტში არასრულწლოვანი მშობლების რაოდენობას შეეხება, 2015 წელს ასეთი 1 449 შემთხვევა დაფიქსირდა.

ამავე ანგარიშში ვკითხულობთ, რომ განსაკუთრებით შემაშფოთებელია საბაზო საფეხურის დასრულებამდე სკოლის მიტოვების ფაქტები. 2015 წელს, ოჯახის შექმნის მიზეზით, სწავლა 13–დან 17 წლამდე 408 მოსწავლემ შეწყვიტა.



ანგარიში "ქალთა უფლებრივი მდგომარეობა და გენდერული თანასწორობის" შესახებ, საქართველოს სახალხო დამცველმა სამთავრობო უწყებების წარმომადგენლებს, საერთაშორისო ორგანიზაციებსა და არასამთავრობო სექტორს დღეს, 13 მაისს წარუდგინა.

ამ ანგარიშის თანახმად, საქართველოში კვლავ გამოწვევას წარმოადგენს ქალთა პოლიტიკური მონაწილეობა. საქართველო ქალთა პოლიტიკური მონაწილეობის მაჩვენებლით 145 ქვეყანას შორის 114-ე ადგილზეა; ასევე, კვლავ პრობლემურია ქალთა შრომითი უფლებების გაუმჯობესების საკითხი; დაბალია საზოგადოების ცნობიერების დონე და ინფორმირებულობა როგორც რეპროდუქციულ და სქესობრივ ჯანმრთელობასა და უფლებებზე, ისე ქვეყანაში არსებულ სერვისებსა და პროგრამებზე. კვლავ გვხვდება აბორტის ისეთი ფორმა, როგორიც გენდერული ნიშნით სქესის სელექციაა და კვლავ მძიმეა ქალთა მიმართ ძალადობისა და ოჯახში ძალადობის თვალსაზრისით არსებული რეალობა.

[ნინო ნარიმანიშვილი, ახალციხე]