ახალციხემ მძლეოსნობის ღია ჩემპიონატს უმასპინძლა

მძლეოსნობის ჩემპიონატში ახალციხის, ფოთის, ქობულეთის, თბილისის, ვანის, ქუთაისისა და ბორჯომის სპორტსმენები მონაწილეობდნენ. 12–დან 17 წლამდე ასაკის გოგონები და ვაჟები ოთხ ასაკობრივ ჯგუფში გაერთიანდნენ: 2004-2005 წლებში დაბადებულები, 2002-2003წწ, 2000-2001წწ და 1998-1999 წლებში დაბადებულები.

ტურნირის მონაწილეებმა მინიმალური დისტანცია 650 მეტრი, მაქსიმალური კი 3 250 მეტრი გაირბინეს.

ჩემპიონატის შედეგად 24 პრიზიორი გამოვლინდა. გამარჯვებულებს ოქროს, ვერცხლისქ და ბრინჯაოს მედლები, ასევე სერტიფიკატები და ფასიანი საჩუქრები გადაეცათ.

„ამარჯვებას ველოდი, რადგან კარგად ვიყავი მომზადებული ფიზიკურად. ჩემთვის ეს ძალიან მნიშვნელოვანია“, – გვითხრა 1998-99 წლებში დაბადებულ გოგონათა ასაკობრივ ჯგუფში გამარჯვებულმა ახალციხელმა მართა ჯვარიძემ.

ჩემპიონატით კმაყოფილი დარჩა ბორჯომის გუნდის ხელმძღვანელი ვალერ ჟანდანი: „ბავშვებმა ბოლომდე იბრძოლეს. პატარა ასაკში ჩვენ დავიკავეთ პირველი ადგილი, როგორც გოგონებში, ისე ბიჭებში“.

ჩემპიონატი მძლეოსნობის სპორტული კლუბისა და ახალციხის მერიის ორგანიზებით მოეწყო.

ახალციხის მძლეოსნობის სპორტული კლუბის დირექტორის ზიგმუნდ ზილბერშტეინის თქმით, 23 აპრილს იგეგმება საერთაშორისო ტურნირის ჩატარება, რომელშიც საქართველოს, სომხეთისა და აზერბაიჯანის გუნდები მიიღებენ მონაწილეობას.

„იქნება შეჯიბრი მოკლე მანძილზე სიგრძეში ხტომაში, ბირთვის კვრაში, უროს ტყორცნაში, შუბის ტყორცნაში, და ა.შ. ეს შეჯიბრიც მძლეოსნობის სპორტული სკოლის ორგანიზებითა და მერიის ხელშეწყობით ჩატარდება“, – განაცხადა ზიგმუნდ ზილბერშტეინმა.

[მარიამ ბარძიმაძე, ახალციხე]