3 მაისი პრესის თავისუფლების დღეა

1991 წლის 3 მაისს აფრიკელი ჟურნალისტები შეიკრიბნენ ნამიბიის დედაქალაქ ვინდჰუკში რეგიონულ სემინარზე, რომელიც შეეხებოდა დამოუკიდებელი და პლურალისტული მასობრივი ინფორმაციის საშუალებათა ხელშეწყობას. მათ მიიღეს ე. წ. „ვინდჰუკის დეკლარაცია“, რომლითაც მოუწოდეს ქვეყნების მთავრობებს პრესის თავისუფლებისა და მისი დემოკრატიული ხასიათის უზრუნველყოფა.

ამ სემინარზე მიღებული დოკუმენტის მნიშვნელობა იმდენად დიდი იყო, რომ 1993 წლის 21 დეკემბერს გაეროს გენერალურმა ასამბლეამ მიიღო გადაწყვეტილება, სწორედ 3 მაისს აღენიშნა თავისუფალი პრესის მსოფლიო დღე.

1997 წლიდან ამ დღეს იუნესკოს/გილერმო კანოს სახელობის პრესის თავისუფლების პრიზის გადაცემის ცერემონიალი ტარდება. წელს ეს პრემია, ფულადი ჯილდო, 25 ათასი დოლარი, დაპატიმრებულ აზერბაიჯანელ ჟურნალისტს, ხადიჯა ისმაილოვას გადაეცემა, „რთულ ვითარებაში პრესის თავისუფლებისათვის შეტანილი გამორჩეული წვლილისათვის“.

გამომძიებელი ჟურნალისტი, რადიო თავისუფლების შტატგარეშე თანამშრომელი ხადიჯა ისმაილოვა, "იუნესკოს" გუილერმო კანოს სახელობის პრესის თავისუფლების პრემიის ლაურეატობის კანდიდატებს შორის გასულ თვეში შეარჩიეს.

გუილერმო კანო ისასა - კოლუმბიელი ჟურნალისტი, რომლის სახელსაც პრემია ატარებს - 1986 წლის 17 დეკემბერს ბოგოტაში, თავისი გაზეთის რედაქციის წინ მოკლეს. ხადიჯა ისმაილოვა აზერბაიჯანში დაპატიმრებულია ფინანსურ მაქინაციებთან დაკავშირებული ბრალდებების საფუძველზე, მაგრამ უფლებადამცველები აცხადებენ, რომ ჟურნალისტ ქალს დევნიან აზერბაიჯანის მმართველ წრეებში კორუფციის შესახებ რეპორტაჟებისათვის.

[sknews.ge]