რატომ აკავშირებენ ახალციხელები პრესის თავისუფლებას ”ოცნებასთან”

ახალციხეში გამოკითხული მოსახლეობის ნაწილის აზრით პრესა მას შემდეგ გახდა თავისუფალი, რაც ხელისუფლების სათავეში ”ოცნება” მოვიდა. საზოგადოების ნაწილის აზრით კი არაფერი შეცვლილა.

”ყველამ კარგად ვიცით რა ხდება, ხალხი დათრგუნულია ხმის ამოღების უფლება არ აქვთ. იმ შემთხვევაში თუ შენს აზრს დააფიქსირებ ეს სამსახურის დაკარგვის ფასად გიჯდება”, - ამბობს ახალციხელი ნანა ღვალაძე.

საპირისპიროს აცხადებს ახალციხელი კარლენ მანასიანი. მისი აზრით პრესისა და სიტყვის თავისუფლება ახალი ხელისუფლების მოსვლის შემდეგ იგრძნობა.

- ”ვიდრე მთავრობა შეიცვლებოდა ამ მხრივ შეზღუდვები იყო. ახლა ტელევიზიაც და პრესაც ყველაფერს აშუქებს. აქამდე რა ხდებოდა პოლიციაში არავინ იცოდა. წინათ ასე თავისუფლად ვერ ვლაპარაკობდით, რადგან შესაძლებელი იყო ვინმეს მოესმინა და პრობლემები შეგვქმნოდა”, - ამბობს იგი.

გაზეთის მკითხველთა რაოდენობის მატებას, პრესის ”ცენზურისგან გათავისუფლებით” ხსნის ”საქართველოს ფოსტის”თანამშრომელი ირმა ბარბაქაძე. მისი თქმით, რადგან საზოგადოებაში შიშის ფაქტორი აღარ არსებობს რესპოდენტებიც უფრო გახსნილები არიან და შესაბამისად ჟურნალისტები რეალურ სურათს ასახავენ თუ რა ხდება ქვეყანაში.

- ”წინა ხელისუფლების დროს საკუთარი აზრის დაფიქსირებას ყველა ერიდებოდა. ახლა ადამიანები უფრო გახსნილები არიან”, - ამბობს ირმა ბარბაქაძე.

სამი მაისი მსოფლიო პრესის თავისუფლების დღედ, გაეროს გენერალური ასამბლეის მიერ 1993 წელს გამოცხადდა. ამ დღეს იმ ინიციატივების მხარდაჭერა და განვითარება ხდება, რაც წაადგება პრესის თავისუფლებას.

სამი მაისის მსოლფიო პრესის დღედ გამოცხადების შესახებ რეკომენდაცია იუნესკოს გენერალური კონფერენციის 26-ე სესიაზე 1991 წელს გაიცა. ეს დღე ემსახურება მოქალაქეთა ინფორმირებას პრესის თავისუფლების შეზღუდვის შესახებ და შეახსენებს საზოგადოებას, რომ მსოფლიოს მთელ რიგ ქვეყნებში გამოცემები ექცევიან ცენზურის ქვეშ, ჯარიმდებიან, იდევნებიან და იხურებიან. ჟურნალისტების, რედაქტორებისა და გამომცემლების მიმართ კი ხორციელდება ზეწოლა, ძალადობა, თავდასხმა და მკვლელობებიც კი.

[თინათინ ზაზაძე,ახალციხე]