ახალციხემ თურქეთის დელეგაციას უმასპინძლა

ახალციხეს 15 კაციანი დელეგაცია სტუმრობდა. მეგობრული ვიზიტის ფარგლებში, დელეგაციის წევრები ახალციხის მერს შეხვდნენ და ტურიზმის განვითარებისათვის რეგიონებში არსებულ პოტენციალზე ისაუბრეს. გიორგი კოპაძე სტუმრებს, საფარისა და ვარძიის ისტორიულ კომპლექსებზე მიმდინარე სამუშებისა და ახალციხის ციხეზე არსებული ინფრასტრუქტურის შესახებ ესაუბრა.

"გაზაფხულია და ინფრასტრუქტურული სამუშაოები დაიწყო ქალაქის კეთილმოწყობისთვის. მარტო ქალაქ ახალციხისათვის დაახლოებით 10 მილიონ ლარამდე იხარჯება, რომ მისი ინფრასტრუქტურა კიდევ უფრო მოწესრიგდეს“,- განმარტა ახალციხის მერმა.

თურქულმა მხარემ მზადყოფნა გამოთქვა მოსაზღვრე მხარეებს შორის შორის ტურისტული ურთიერთობის განვითარებისა და გაღრმავებისთვის.

„მნიშვნელოვანია, რომ მოვახერხოთ არტაანისა და სამცხე-ჯავახეთის მხარეში ტურიზმის განვითარება. რაც მთავრია, ეს კაპიტალდაბანდებას მოუტანს როგორც ერთ, ასევე მეორე მხარეს“, - განმარტა ქალაქ არტაანის მერმა ფარუქ ქოქსოიმ.

ახალციხის მერიის შემდეგ, არტაანის დელეგაციამ სამცხე-ჯავახეთის სახელმწიფო უნივერსიტეტში გადაინაცვლა.უმაღლეს საგანმანათლებლო დაწესებულებაში სტუმრებმა და მასპინძლებმა წიგნის პრეზენტაცია გამართეს.

"ეს ძალიან საინტერესო ერთობლივი პროექტია, არტაანელებთან ერთად შევქმენით სამცხე-ჯავახეთის სამზარეულო, რომელიც ქართულ და თურქულ ენებზე გამოდის. ჯერ წიგნი არ არის დაბეჭდილი, მაგრამ მოხდება პროექტის პრეზენტაცია, დაახლოებით ერთ-ორ თვეში წიგნიც იქნება“, - განმარტავს სამცხე-ჯავახეთის სახელმწიფო უნივერსიტეტის რექტორი მერაბ ბერიძე.







[თაკო ფეიქრიშვილი, ახალციხე]