სამცხე–ჯავახეთს არტაანის დელეგეცია ესტუმრა

არტაანის დელეგაციას სამცხე–ჯავახეთის გუბერნატორმა აკაკი მაჭუტაძემ, ახალციხის მერმა გიორგი კოპაძემ, ახალციხის მუნიციპალიტეტის გამგებელმა ზაზა მელიქიძემ და ადგილობრივი ხელისუფლების სხვა წარმომადგენლებმა უმასპინძლეს.

"ვისაუბრეთ გამშვებ პუნქტებზე, არტაანის გუბერნატორის თქმით, კარწახის გამშვები პუნქტი გაიხსნება სექტემბრის ბოლოსთვის, ასევე მომავალი წლიდან დაიწყება ვალის გამშვები პუნქტის რეაბილიტაცია, რის შემდეგაც საქართველოს მხრიდან თურქეთში იმპორტი უკვე შესაძლებელი გახდება. აქამდე ვალის გამტარი პუნქტი მხოლოდ ტრანზიტის ფუნქციას ასრულებდა. ეს იქნება ორივე მხარისთვის წარმატებული“, – ამბობს სამცხე–ჯავახეთის გუბერნატორი აკაკი მაჭუტაძე და ამატებს, რომ შეხვედრაზე ტურისტული მიმართულებების განვითარებაზეც ისაუბრეს.

არტაანის გუბერნატორის, საკრებულოს თავმჯდომარის, ფოსოფის გამგებლის, არტაანის სავაჭრო–სამრეწველო პალატის თავმჯდომარის ვიზიტის მიზანი სამცხე–ჯავახეთსა და არტაანს შორის არსებული მეგობრული ურთიერთობების გაღრმავება, ასევე ეკონომიკური და ტურისტული თანამშრომლობის განვითარება იყო.

„ვფიქრობ ჩვენი ურთიერთობები და კონსულტაციები წაადგება მხარეების ეკონომიკურ განვითარებას, ასევე ხელს შეუწყობს რეგიონებს შორის თანამშრომლობას სხვადასხვა სფეროში. ჩვენ ვართ არა მხოლოდ მეზობელი, არამედ მეგობარი სახელმწიფოები, როგორც გაჭირვების, ასევე დალხინების ჟამს ერთმანეთს გვერდში უნდა დავუდგეთ. თურქეთსა და საქართველოს საუკეთოსო ურთიერთობა გააჩნია და ეს უნდა გამოვიყენოთ მოგობრობის კიდევ უფრო გაღრმავებისთვის“, – განაცხადა არტაანის მხარის გუბერნატორმა აჰმედ დენიზიმა.

შეხვედრის დასრულების შემდეგ სტუმრები და მასპინძლები ვარძიის დასათვალიერებლად გაემგზავრნენ.



[თამარ თოთაძე, ახალციხე]