ახალციხის მაღალმთიან სოფლებში გზებს აგებენ

2 მილიონი ლარის ფარგლებში, ახალციხის თემში ჯამში 10 კილომეტრიანი გზა მოწესრიგდება. ადგილობრივი თვითმმართველობის ინფორმაციით, გზების რეაბილიტაცია მაღალმთიან სოფლებში ხორციელდება, სადაც ზამთრის პერიოდსა და უამინდობაში მოსახლეობას გადაადგილება უჭირს.

ამ ეტაპზე, შიდა გზის სარეაბილიტაციო სამუშაოები მიმდინარეობს სოფელ ნაოხრებში, სადაც 430 მეტრიან მონაკვეთზე არმირებული ბეტონი იგება, ეწყობა ღია და დახურული სანიაღვრე არხები, გვერდულები კი სპეციალური მოსაპირკეთებელი ინერტული მასალით შეივსება. სამუშაოები ცენტრალური ბიუჯეტიდან 128 ათასი ლარით ფინანსდება.

ასფალტ-ბეტონის საფარის დასაგებად გზის საფუძვლის მოსამზადებელი სამუშაოები დაწყებულია ახალციხე- წყრუთი-ანის, წყრუთი-ჭვინთა-ელიაწმინდისა და სოფელ მუსხის საავტომობილო გზებზეც.

სამუშაოების მიმდინარეობის პროცესს მხარის გუბერნატორი აკაკი მაჭუტაძე და ახალციხის მუნიციპალიტეტის გამგებელი ზაზა მელიქიძე ადგილზე გაეცნენ.

[sknews.ge]