ბორჯომელმა საფრენი აპარატის ამწყობმა გაფრენა სცადა

ბორჯომელი გამომგონებელი ამბობს, რომ აპარატს ძრავმა უმტყუნა.

„მხოლოდ რამდენიმე მეტრზე აფრინდა. იმის გამო, რომ ფრენა ვერ შეძლო, მალევე მიწაზე დავუშვით. აღმოჩნდა, რომ ძრავთან დაკავშირებით რაღაცა დეტალები უნდა გაგვეთვლისწინებინა, პრობლემა შეექმნა საბურავებსაც“, – ამბობს საფრენი აპარატის ამწყობი და ამატებს, რომ იმის გამო, რომ საფრენი მოწყობილობის მართვა არ იცის, გაფრენის მცდელობაში მეგობარი დაეხმარა.

პროფესიით ელექტროშემდუღებელმა ნიკოლოზ ბოსტოღანაშვილმა საფრენი აპარატის აწყობა 19 წლის წინ დაიწყო. მოწყობილობისთვის ბურანისა და „სუზუკის“ ნაწილებს იყენებს. საფრენი აპარატის ძრავის სიმძლავრე 140 ცხენის ძალაა: „ეს საკმარისია იმისთვის, რომ გაფრინდეს“.


ნიკოლოზ ბოსტოღანაშვილის მიერ აწყობილი საფრენი აპარატი. გოგა ჩანადირის ფოტო

პირველად მოწყობილობა 2000 წელს გამოსცადა, მეორედ 2010–ში. სამი მცდელობიდან წარმატებული პირველი გამოდგა. მესამე მცდელობის მსგავსად, მეორე მცდელობაც ტექნიკურმა დეტალებმა შეაფერხა.

ნიკოლოზ ბოსტოღანაშვილი საფრენ მოწყობილობაზე მუშაობას აგრძელებს. ამბობს, რომ ორ თვეში მოწყობილობას თავიდან გამოცდის და დარწმუნებულია, მცდელობა წარმატებული იქნება.

ნახეთ, "სამხრეთის კარიბჭეს" მიერ 19 მარტს მომზადებული სიუჟეტი, ბორჯომელი გამომგონებლის შესახებ.



[ლუბა გიორგაძე, ბორჯომი]