NDI: სოფლად ყველაზე მეტად გზები და გაზმომარაგება აწუხებთ

ინფრასტრუქტურულ საკითხებთან დაკავშირებულ პრობლემებში, რომლებიც მოსახლეობას თავიანთ დასახლებულ პუნქტებში აწუხებს, პირველ ადგილს გზები (47%) იკავებს, მეორე ადგილზეა გაზმომარაგება (23 %), მესამეზე წყლით მომარაგება (19%), შემდეგ მოდის გარემოს დაბინძურება (18%), საგზაო მოძრაობა (13%), საზოგადოებრივი ტრანსპორტი (12%), კანალიზაცია (12%) და სხვა.

აქედან, უმცირესობათა დასახლებებში ყველაზე მეტად გზები და წყლით მომარაგება აწუხებთ, სოფლად მცხოვრებლებს კი გზები და გაზმომარაგება.

შეკითხვაზე, რამდენად გაუმჯობესდა თქვენ სოფელში–ქალაქში საცხოვრებელი პირობები 2014 წლის ივნისის შემდეგ 53% აცხადებს, რომ იგივე დარჩა, 25 % ფიქრობს, რომ გაუარესდა, 19 % მიიჩნევს, რომ გაუმჯობესდა, 2 %–მა არ იცის.

აქედან ქალაქში მცხოვრები 54% მიიჩნევს, რომ მდგომარეობა მის ქალაქში იგივე დარჩა, 25% ამბობს რომ გაუარესდა, 18% კი აცხადებს, რომ გაუმჯობესდა.

რაც შეეხება სოფელს, 55 % ფიქრობს, რომ მდგომარეობა იგივე დარჩა, 24% აცხადებს რომ გაუარესდა, 20 % ამბობს რომ გაუმჯობესდა. რაც შეეხება უმცირესობათა დასახლებებს, 46%–ის აზრით ყევლაფერი იგივე დარჩა, 28 %–ის აზრით გაუმჯობესდა, 24 %–ის აზრით გაუარესდა.

შეკითხვაზე, ყველაფრის გათვალისწინებით, 2012 წლის ოქტომბრის არჩევნების შემდეგ, თქვენ და თქვენი ოჯახი შედარებით ხართ უკეთესად, უარესად, იგივე მდგომარეობაში თუ არ იცით, პასუხები ასე გადანაწილდა: 51% – იგივე მდგომარეობაში, 32% – უარესად, 17% – უკეთესად, 1% – არ ვიცი.

მათ შორის, გამოკითხულთა 36% ფიქრობს, რომ მისთვის მნიშვნელოვან ცვლილებებს სახელმწიფო ნაწილობრივ ახორციელებს, 32% კი მიიჩნევს რომ სახელმწიფო მისთვის მნიშვნელოვან ცვლილებებს საერთოდ არ ახორციელებს.

რაც შეეხება უმცირესობათა დასახლებებს, აქ მაღალია იმ რესპონდენტების რიცხვი, რომლებმაც არ იციან, ახორციელებს თუ არა სახელმწიფო მათთვის მნიშვნელოვან ცვლილებებს. ასე 14% ფიქრობს.

NDI-ის გამოკითხვა 2016 წლის 8 ივნისიდან 6 ივლისის პერიოდში ჩატარდა. კვლევის ავტორების თქმით, საქართველოს მასშტაბით 4 113 ადამიანი გამოიკითხა, პირისპირ ინტერვიუს წარმომადგენლობითი შერჩევის საფუძველზე, ქვეყნის ქართულენოვან, სომხურენოვან და აზერბაიჯანულენოვან მოსახლეობაში. კვლევაში საშუალო ცდომილების ზღვარი +/- 2,1%–ია. კვლევა დაფინანსებულია შვედეთის საერთაშორისო თანამშრომლობის განვითარების სააგენტოს (SIDA) მიერ. ჩაატარა CRRC-საქართველომ.

[sknews.ge]