ილია მეორე: ადამიანს ჯვარს აძლევს უფალი და აძლევს ისეთს, რომლის ტარებაც შეუძლია [Video]

დღეს მართლმადიდებელი ეკლესია ჯვრის თაყვანისცემის დღესასწაულს აღნიშნავს. წირვა–ლოცვა სამების საკათედრო ტაძარში სრულიად საქართველოს პატრიარქმა ილია მეორემ აღავლინა. ღვთისმსახურების დასრულების შემდეგ კი პატრიარქმა იქადაგა.

„ზოგიერთ ადამიანს ეძლევა ჯვარი პირადი პრობლემების, ზოგიერთ ადამიანს ეძლევა ჯვარი ერის ტვირთისა, ერის სიმძიმისა... ადამიანი, რომელსაც გააჩნია მძიმე ჯვარი, არის შემთხვევა ეცემა, ვეღარ მიდის, თითქოს, ყველაფერი უკვე დამთავრებულია, ფიქრობს რომ ამით დამთავრდება მისი ცხოვრება, მაგრამ, ადამიანმა უნდა მოიკრიბოს ძალა და სთხოვოს, უფალს. უფალი თვითონ მიდის და ეხმარება ადამიანს ჯვრის ტარებაში", - ბრძანა პატრიარქმა.

მისი თქმით, ადამიანის ცხოვრება შედგება ჯვრისაგან, ადამიანმა უნდა შექმნას თავისი ცხოვრებით ჯვარი, ეს არის ვერტიკალური სწრაფვა ღვთისაკენ და ჰორიზონტალური სწრაფვა ადამიანისაკენ. ეს ორი სწრაფვა შეადგენს ჯვარს და ბედნიერია ის ადამიანი, რომელიც თავისი ცხოვრებით შექმნის ჯვარს.

"უამრავი მაგალითია, როდესაც ადამიანს მძიმე ჯვარი ჰქონდა, მაგრამ ბოლომდე მიიტანა. ჩვენც უნდა შევთხოვოთ უფალს, რომ ბოლომდე მივიტანოთ ეს ჯვარი და წარვადგინოთ ღვთის წინაშე", – აღნიშნა პატრიარქმა.



[sknews.ge]