ახალციხეს გაზის მიწოდება შეუწყდა და დილამდე არ ექნება

9 აპრილის ქუჩა, შემთხვევის ადგილზე "ინტერგაზის" თანამშრომლები მუშაობენ

ქალაქ ახალციხეს ბუნებრივი აირის მიწოდება დაახლოებით 20:30 საათზე შეუწყდა. შპს „ინტერგაზის“ დირექტორის ვასილ აბულაძის განმარტებით, ახალციხეში, 9 აპრილის ქუჩაზე გაზის მილს ავტომანქანა დაეჯახა, რის გამოც, კომპანიამ გაზის მიწოდება მთელს ქალაქს შეუწყვიტა.

მისივე თქმით, სავარაუდოდ გაზის მიწოდება დილამდე ვერ აღდგება: "ნახევარ საათში დაასრულებენ მუშაობას, მაგრამ ღამით გათიშული გაზის ჩართვა არაა მიზანშეწონილი, შესაძლოა ამის გამო რაიმე უბედურება მოხდეს. დილით 09:00 საათისთვის გაზის მიწოდება აღდგენილი იქნება".

ავტოსაგზაო შემთხვევა 9 აპრილის ქუჩაზე დაახლოებით 20:25 საათზე მოხდა. გაზის ცენტრალურ მილს "ფორდის" მარკის ავტომობილი შეეჯახა.
თვითმხილეველების თქმით, სავარაუდოდ ავტომობილის მძღოლმა საჭე ვეღარ დაიმორჩილა, ფეხით მოსიარულეთა ნაწილზე, ე.წ. ტროტუარზე ავარდა და გაზის მილს დაეჯახა. ავტოსაგზაო შემთხვევის შედეგად არავინ დააშავებულა.

საქართველოს შინაგან საქმეთა სამინისტროში "სამხრეთის კარიბჭეს" განუმარტეს, რომ მომხდარზე ადმინისტრაციულ სამართალდარღვევათა ოქმი გაფორმდა და მძღოლი 250 ლარით დაჯარიმდა.

ამ დროისთვის ბუნებრივი აირის გარეშე ახალციხეში 5700 აბონენტია დარჩენილი. შემთხვევის ადგილზე ამ დრომდე მუშაობენ შპს "ინტერგაზის" თანამშრომლები.

[sknews.ge]