9 აპრილზე ავტოავარიის შედეგად გაზის მილი გასკდა და ბუნებრივი აირი ჰაერში გაიფრქვა [Photo]

შემთხვევა დღეს, 16 ოქტომბერს, დაახლოებით 20:00 საათზე, 9 აპილისა და გვარამაძის ქუჩის გადაკვეთასთან მოხდა. ერთმანეთს „ფორდისა“ და „მაზდას“ მარკის ავტომობილები შეეჯახნენ.

მიმდებარე კორპუსში მცხოვრებთა ნაწილი ამბობს, რომ გარეთ ძლიერი ხმაურზე გამოვიდნენ. დაინახეს მილს შემსკდარი ავტომანქანა და შენიშნეს, როგორ იფრქვეოდა მილიდან გაზი.

ბუნებრივი აირის მომწოდებელმა კომპანიამ, შპს "ინტერგაზმა" მიმდებარე ქუჩაზე გაზი მაშინვე გადაკეტა. ამ დროისთვის, გაზის გაფრქვევა საშიშროებას აღარ წარმოადგენს. ადგილზე ჯერ ისევ მუშაობს გაზის კომპანიის ბრიგადა.

როგორც ავტოსაგზაო შემთხვევის ერთ–ერთი მონაწილე, „მაზდას“ მარკის ავტომობილის მძღოლი ამბობს, „ფორდი“ მის წინ მოძრაობდა, 9 აპრილის ქუჩაზე მოულოდნელად მარცხნივ, გვარამაძის ქუჩაძე, ჩიხში დააპირა შეხვევა, ისე რომ მოხვევის მაჩვენებელი ციმციმა არ ჩაურთავს. ბუნებრივია, თავად გზა გააგრძელა და ამ დროს მის წინ მოძრავმა მანქანამ ჯერ მას დაარტყა, მერე კი მოსახვევში გაზის მილს შეასკდა.

„თვითონაც დაიბნა და მეც დამაბნია“, – ამბობს სხვილისში მცხოვრები მამაკაცი, რომელიც მისივე თქმით, თბილისში, საავადმყოფოში მიდიოდა, სადაც მისი მეუღლე წევს.

მის ნათქვმს უარყოფს "ფორდის" მძღოლი ქალბატონი. მისი თქმით, მოხვევის მანიშნებელი ჩართული ჰქონდა და მოძრაობის წესი არ დაურღვევია: "უკანა მანქანა მოდიოდა ძალიან სწრაფად, უკნიდან დამარტყა და ტროტუარზე შემადგო, სადაც გაზისა და დენის სვეტებსს დავეჯახე".

ამ დროისთვის ორივე მძღოლი შემთხვევის ადგილზე იმყოფება. ადგილზე მობილიზებულია საპატრულო პოლიცია და კვლავ რჩებიან გაზის მომწოდებელი კომპანიის თანამშრომლები.

ამ დროისთვის ბუნებრივი აირი არ მიეწოდება 9 აპრილის ქუჩის ნაწილს. გვარამაძის ჩიხში კი 9 აპრილიდან მოძრაობა აკრძალულია.









[თინათინ ზაზაძე, ვარლამ წიკლაური, ნინო ნარიმანიშვილი, ახალციხე]