პროფესიული განათლების მიღების მსურველთა რეგისტრაცია დაიწყო

ახალციხის პროფესიული სასწავლებელი. ფოტო: სამხრეთის კარიბჭეს არქივიდან

საქართველოს განათლებისა და მეცნიერების სამინისტროში აცხადებენ, რომ ყველა დაინტერესებულ პირს აქვს შესაძლებლობა სახელმწიფო დაფინანსებით დაეუფლოს მისთვის სასურველ პროფესიას ტურიზმის, მშენებლობის, სოფლის მეურნეობის, ინფორმაციული ტექნოლოგიების, მომსახურებისა და სხვა მიმართულებით.

საქართველოში სახელმწიფოს მიერ/მონაწილეობით დაფუძნებული 34 საგანმანათლებლო დაწესებულება ფუნქციონირებს. მიმდინარე წლის საგაზაფხულო მიღებაზე რეგისტრაციის პროცესში ჩართულია და მონაწილეობას იღებს პროფესიული პროგრამების განმახორციელებელი 26 საგანმანათლებლო დაწესებულება.

სამინისტროს ინფორმაციით, რეგისტრაციის გავლა შესაძლებელია საქართველოს მასშტაბით არსებულ საინფორმაციო ცენტრებში, საგანმანათლებლო რესურსცენტრებსა და პროფესიული საგანმანათლებლო პროგრამების განმახორციელებელ დაწესებულებაში. რეგისტრაციის მსურველმა თან უნდა იქონიოს მხოლოდ პირადობის მოწმობა.

რეგისტრაციის დასრულების შემდეგ, დარეგისტრირებულმა აპლიკანტმა საწყის საფეხურზე სწავლის დასაწყებად, უნდა გაიაროს სამინისტროს შეფასებისა და გამოცდების ეროვნული ცენტრის მიერ ორგანიზებული პროფესიული ტესტირება. სპეციალური საგანმანათლებლო საჭიროების მქონე პირები სარგებლობენ ალტერნატიული პროფესიული ტესტირების ფორმებით.

საფეხურიდან საფეხურზე გადასვლისა და სწავლის გაგრძელების მსურველები კი, პროფესიულ საგანმანათლებლო დაწესებულებაში რეგისტრაციის შემდეგ, თავად დაწესებულების მიერ ორგანიზებულ ტესტირებას გაივლიან.

„დამსაქმებლებთან თანამშრომლობით, დაიხვეწა რიგი პროფესიული საგანმანათლებლო პროგრამებისა. პროფესიული სასწავლებლები აღჭურვილია განახლებული ინფრასტრუქტურით, თანამედროვე მატერიალურ-ტექნიკური ბაზით და თანამშრომლობენ სხვადასხვა კომპანიებთან, რომლებიც უზრუნველყოფენ პროფესიული სტუდენტების სტაჟირებასა და წარმატებული კურსდამთავრებულების დასაქმებას“, – აცხადებენ სამინისტროში.

სამინისტროს მონაცემებით, პროფესიულ საგანმანათლებლო პროგრამებზე ჩარიცხვა, 2013 წლის შემოდგომაზე, ხოლო შემდეგ, გასული წლის (2014) გაზაფხულსა და შემოდგომაზე განხორციელდა. ჯამში 19000-მდე აპლიკანტი ჩაირიცხა და მიიღო 100%-იანი სახელმწიფო დაფინანსება სასურველი პროფესიის დასაუფლებლად. ჩარიცხულთაგან 200-ზე მეტი, სპეციალური საგანმანათლებლო საჭიროების მქონე პირი იყო.

[ნინო ნარიმანიშვილი, ახალციხე]