უმცროსკლასელი მოსწავლეები მძიმე სასკოლო ჩანთებს უჩივიან

ელეონორა გვარამაძე ტყუპი გოგონების დედაა. ამბობს, რომ მის ერთ-ერთ ქალიშვილს დატვირთვის გამო ზურგის არეში ტკივილები დაეწყო.

- ’ბეჭებშიც მოიხარა, ძალიან ვნერვიულობდი. ახლა ბავშვს ცეკვაზე ვატარებ, სხვადასხვანაირ ვარჯიშებს ვაკეთებინებ და მდგომარეობა მგონი უმჯობესდება’, - ამბობს იგი.

შვილის სასკოლო ჩანთის სიმძიმე აწუხებს ლუსინე დურგალიანსაც.

- ‘ერთხელ ჩანთა ავწონეთ და რვა კილო გამოვიდა. ჩემი შვილი კი ძალიან გამხდარია, 31 კილოა, როგორ შეიძლება ამსიმძიმე ჩანთის ყოველდღე ტარება?!’ - ამბობს იგი.

მოსწავლეები ამბობენ, რომ სახელმძღვანელოები ისეა შედგენილი, რომ აუცილებელია სკოლაში ყოველდღე ყველა წიგნი წაიღონ. ამიტომ, ხშირად მათ ჩანთის ტარებაში მშობლები ეხმარებიან, ზოგმა კი ზურგჩანთა გორგოლაჭებიანი ჩანთით ჩაანაცვლა.

’სახელმძღვანელოებში სურათები უფრო მეტია ვიდრე ტექსტი. არ შეიძლება ასეთი რამ. როგორ შეიძლება ბავშვის ჩამოუყალიბებელმა ხერხემალმა ყოველდღე ამხელა დატვირთვა მიიღოს?! იქნებ წიგნები ნაწილებად გამოუშვან, ამით ბავშვებს ტვირთი შეუმსუბუქდებათ,’ - ამბობს ნინო ინასარიძე.

სიმძიმის შესაძლო შედეგებზე ექიმებიც საუბრობენ. მათი თქმით, ხერხემლის დატვირთვამ შესაძლოა სვეტის გამრუდება, სქოლიოზი გამოიწვიოს.
- ’დიდმა დატვირთვამ შესაძლოა გულმკერდის ღრუს და ტერფის ძვლების დეფორმაციაც გამოიწვიოს. ტერფის ძვლების დეფორმაცია კი თავსი მხრივ პრტყელტერფიანობას იწვევს.
ამიტომ, საკითხი მეტად მნიშვნელოავანია და აუცილებლად უნდა მიექცეს’, - ამბობს ახალციხის საავადმყოფოს ქირურგი და ვინაობის დაკონკრეტებისგან საავადმყოფოში არსებული მდგომარეობის გამო თავს იკავებს. (შეგახსენებთ, ’ალდაგი ბისიაის’ შესვლის შემდეგ საავადმყოფოში კადრების შემცირება მიმდინარეობს).

[ნინო ბერიძე, ახალციხე]