მიმღები მშობელი სოციალურ მუშაკს უპირისპირდება

ახალციხეში მცხოვრები მარინა ჩამანიანი გადაუდებელ მიმღებ მშობლად რეგისტრაციიდან მოხსნეს და შესაძლოა მას რეგულარულ მინდობით აღზრდაში რეგისტრაციაც გაუუქმონ.

ჩამანიანი სოციალური მომსახურების სააგენტოს სამცხე–ჯავახეთის სოციალური მომსახურების სამხარეო ცენტრში მიმღებ მშობლად 2015 წლის 7 სექტემბერს დარეგისტრირდა.

ამბობს, რომ მინდობით ბავშვის აღზრდაზე დიდხანს ფიქრობდა: „მთელი დღე სახლში ვიყავი, ლარაპარკის უნარი მეკარგებოდა, ვიფიქრე მადლია, ავიყვან ბავშვს და გავზრდი–მეთქი“.

ამბობს, რომ მის გარშემო მინდობითი აღზრდით ბავშვები ძალიან ბევრს ჰყავდა აყვანილი, თვეების განმავლობაში მათ აკვირდებოდა და პროგრამის დეტალებსაც ეტაპობრივად ეცნობოდა: „პირველად სააგენტოში რომ მივედი, გოგონას, რომელიც მესაუბრა, ელენე ერქვა. მასთან შევთანხმდი რა დოკუმენტები უნდა მიმეტანა. როცა ყველაფერი მოვაგროვე და მივედი, ისევ ელენე ვიკითხე, მაგრამ სხვა გოგონა დამხვდა. გაღიზიანებული ტონით მიპასუხა, რა მნიშვნელობა აქვს რომელი ვართ, აქ მეც მაგისთვის ვზივარო“.

მისი თქმით, სოციალური მუშაკი, რომელმაც მისი განაცხადი მიიღო ქეთევან გვარამაძეა. მას შემდეგ, რაც შესამოწმებლად ოჯახში მივიდა და პროგრამის დეტალები შეუთანხმა, რაიმე დაძაბულობა, ან უკმაყოფილო საუბარი აღარ ჰქონიათ: „ამიხსნა, რომ შეგიძლია გადაუდებელზეც დარეგისტრირდე, წლობით რომ არ ელოდო ბავშვსო. შეიძლება ღამითაც მოგიკაკუნონ და ბავშვი მოგიყვანონო“.

მარინა ამბობს, რომ მაშინ სოციალურ მუშაკს აუხსნა, რომ ბავშვის სქესს, ეროვნებას, აღმსარებლობას და ა.შ. მნიშნვლეობა არ ჰქონდა: „უბრალოდ, ასაკით დიდი არ მინდოდა. უფროსები საკუთარ მშობლებს არ უჯერებენ და მე რას დამიჯერებდა. მაგრამ ვუთხარი, თუ დედმამიშვილები იქნებიან, ასაკის გამო არ დავაშორებ–მეთქი“.

მისივე თქმით, ქეთევან გვარამაძემ განუმარტა, რომ ბავშვები, რომლებსაც მინდობით აღზრდაში გადასცემდნენ, შესაძლოა რთულები ყოფილიყვნენ: „ამის გამო არ შევშინებულვარ. რთულში ვიგულისხმე ის, რომ ყველა ბავშვს ერთხელ ნათქვამი ყოველთვის არ ესმის“.
ჩამანიანის განცხადება გადაუდებელ მშობლობაზეც დაკმაყოფილდა.

„ქეთიმ ამიხსნა, სრული უფლება გაქვს, თუ ბავშვს ნახავ და არ მოგეწონება, უარი თქვაო. ვკითხე, ამის გამო საბუთები ხომ არ გამიფუჭდება–თქო და არაო. თან მითხრა, ვეცდებით შენი შვილიშვილის ტოლი ბავშვი მოგიყვანოთ, რომ ერთმანეთის მიმართ პატარებს აგრესია არ გაუჩნდეთო“, – აცხადებს ჩამანიანი.


ამ შეთნხმებიდან მალევე, 7 დეკემბერს, დაახლოებით დილის 11:00 საათზე გვარამაძემ ჩამანიანთან დარეკა.

„მითხრა, ავღანელი ბიჭია, 14 წლის, საღვარზე იპარებოდა, დაიჭირეს და ვიდრე სასამართლო გადაწყვეტილებას გამოიტანს, შენთან უნდა იყოსო. შემეშინდა, ავღანეთში 12 წლიდან იარაღით თამაშობენ, თან ის თუ საზღვარზე იპარებოდა, სახლში ღამეები უნდა მეთია, რომ არ გამპარვოდა?!“ – ამბობს ჩამანიანი.

ამის გამო მან 14 წლის ბიჭის მიღებაზე უარი განაცხადა, ეს სააგენტოში წერილობითაც დაადასტურა: „ქეთევანმა აგრესიულად მიმიღო: ეს რა საბავშვო ბაღია, მინდა არ მინდაო?! ბავშვი ქუჩაში უნდა დამრჩესო?! ღამის ორ საათზე რომ მომეყვანა, გარეთ უნდა დამრჩენოდაო. ცხოვრებაში ბავშვის შვილად აყვანა აღარ გეღირსება და რიგიდანაც მოგხსნიო“.

როგორც „სამხრეთის კარიბჭეს“ სასაზღვრო პოლიციაში განუმარტეს 14 წლის მოზარდს ბრალი საქართველო-თურქეთის სახელმწიფო საზღვრის ჯგუფურად უკანონოდ გადაკვეთის მცდელობისათვის დასდეს. გამოძიებით დადგინდა, რომ აღნიშნული პიროვნება ოჯახის მიერ იყო მიბარებული ნათესავს და საქართველოში მასთან ერთად მოხვდა: „აქედან კი საკუთარი ნებით აპირებდა თურქეთის რესპუბლიკაში გადასვლას სამუშაოდ. მიზანი იყო ავღანეთში მყოფ ოჯახს დახმარებოდა. გამომდინარე იქიდან, რომ პიროვნება იყო არასრულწლოვანი, პატიმრობის ნაცვლად, ნორიოს თავშესაფარში გადავიყვანეთ“.

ამ უარის გამო ჩამანიანი გადაუდებელ მიმღებ მშობლად რეგისტრაციიდან მოხსნეს. იგი ამაში ქეთევან გვარამაძეს ადანაშაულებს და ირწმუნება, რომ მან ურთიერთ გამომრიცხავი ინფორმაცია შეგნებულად მიაწოდა, სურდა მისი ოჯახი მინდობითი აღზრდის პროგრამიდან ჩამოეშორებინა: „არ ამიხსნა, რომ გადაუდებელზე უარის თქმის შემთხვევაში რეგისტრაციიდან მომხსნიდნენ“.

რას პასუხობენ ჩამანიანის ბრალდებებს?

გვარამაძეს „სამხრეთს კარიბჭესთან“ ჩამანიანის ბრალდებებზე კომენტარის გაკეთება არ უნდა. სოციალური მომსახურების სააგენტოს სამცხე–ჯავახეთის სოციალური მომსახურების სამხარეო ცენტრის უფროსი დავით გოგალაძე კი დარწმუნებულია, რომ გვარამაძეს არაფერი შეეშლებოდა და ყველა დეტალს ჩამანიანს დაწვრილებით აუხსნიდა.

„ეს ქალბატონი იყო დარეგისტრირებული გადაუდებელ მიმღებად. როცა ასეთი ოჯახი გეგულება, ბავშვი გარეთ არ უნდა დაგრჩეს. გასაგებია, რომ რისკებს ხედავს, მაგრამ ჩვენც ხომ გვაქვს ჩვენი ვალდებულებები?! გადაუდებელზე უარის თქმის უფლება არავის აქვს“, – აცხადებენ სოციალური დაცვისა და ჯანმრთელობის სამინისტროში.

სოციალური მომსახურების სააგენტოსა და სამინისტროშიც აცხადებენ, რომ თუ ჩამანიანი კვლავ ასეთი ფორმით გააგრძელებს მათთან ურთიერთობას, რეგულარული მინდობითი აღზრდიდანაც მოხსნიან. ჩამანიანი კი ამბობს, რომ თუ ბავშვს მინდობით აღზრდაში აიყვანს, მაშინ ვიდეო თვალს დააყენებს: „შესაძლოა ამ გოგონამ კიდევ რაიმე უსიამოვნება მომიწყოს“.

[თამუნა უჩიძე, ახალციხე]