შეზღუდული შესაძლებლობის მქონე ბავშვები ოჯახებში აღიზრდებიან

პროექტი - “ბავშვზე ზრუნვის მომსახურებისა და სისტემების გაძლიერება”, ბრიტანულმა საერთაშორისო საქველმოქმედო ორგანიზაცია ‘ევრიჩაილდმა’(EveryChild) შეიმუშავა. პროექტს ‘შრომის, ჯანმრთელობის და სოციალური დაცვის სამინისტრო’ და საპატრიარქო უჭერს მხარს.

პროექტში საპატრიარქო თავიდანვე აქტიურად ჩაერთო. რამდენიმე დღის წინ ‘ახალციხისა და ტაო–კლარჯეთის’ ეპარქიას ‘ევრიჩაილდისა’ და საპატრიარქოს წარმომადგენლები სტუმრობდნენ. ისინი ეპარქიას აღნიშნული პროექტის შესახებ ესაუბრნენ.
- ‘წარმომადგენლები საქართველოს ყველა ეპარქიას ესტუმრნენ. მათ გვთხოვეს, რომ მღვდლებმა მრევლში გაავრცელონ ეს ინფორმაცია. ჩვენ ბუკლეტები დავურიგეთ მრევლს ორი დღის წინ. მსურველები ჯერ არ გამოჩენილან. მსურველებს შეუძლიათ ტაძრში მოგვმართონ მამაოებს. დავეხმარებით და დავაკვალიანებთ’, - გვითხრა მამა ანდრიამ.

შეზღუდული შესაძლებლობის მქონე (შშმ) ბავშვები ამჟამად სხვადასხვა რეგიონის ბავშვთა სახლებში იმყოფებიან. ბავშვი სპეციალიზებულ მინდობით აღზრდაში თავსდება, თუ ის 0–18 წლამდე ასაკისაა, აქვს შეზღუდული შესაძლებლობის მქონეს სტატუსი, საჭიროებს გადაუდებელ თავშესაფარს და აქვს მინდობით აღზრდაში განთავსების რეკომენდაცია სოციალური მუშაკის შეფასების საფუძველზე.

შშმ ბავშვის მშობელი შეიძლება გახდეს ადამიანი, რომელიც გამოთქვამს ბიოლოგიურ ოჯახთან თანამშრომლობის მზაობას, აქვს დრო, ენერგია და სურვილი აღზარდოს ბავშვი. ასევე ის არ უნდა იყოს ნასამართლევი მძიმე დანაშაულისთვის. უნდა იყოს დაქორწინებული, განქორწინებული, მარტოხელა ან არარეგისტრირებულ ქორწინებაში მყოფი.

მიმღებ მშობელსა და სახელმწიფოს შორის ფორმდება შრომითი ხელშეკრულება. ხელშეკრულების თანახმად, მშობელს აღზრდის პროცესი სამუშაო სტაჟში ეთვლება, ასევე მშობელი თავისუფლდება საშემოსავლო გადასახადით დაბეგვრისაგან. გრძელვადიანი მინდობითი აღზრდის შემთხვევაში (ბავშვის განთავსება 18 წლის შესრულებამდე) აღმზრდელი იღებს ყოველთვიურად 600 ლარს, ხოლო გადაუდებელი მინდობითი აღზრდის შემთხვევაში (ბავშვის განთავსება 1 დღიდან 3 თვემდე) ყოველდღიურად 20 ლარს. ამ ტიპის აღსაზრდელი ჯანმრთელი ბავშვიც შეიძლება გახდეს.

‘EveryChild’ ბრიტანული საერთაშორისო საქველმოქმედო ორგანიზაციაა. ორგანიზაცია ბავშვთა კეთილდღეობისა და უფლებების დაცვის საკითხებზე საქართველოში 1998 წლიდან მუშაობს. ’ევრიჩაილდი’ პროგრამებს მსოფლიოს 17 ქვეყანაში ახორციელებს. პროექტი ’ბავშვზე ზრუნვის მომსახურებისა და სისტემების გაძლიერების’ ძირითადი მიზანი მინდობითი აღზრდის სისტემის განვითარება და ბავშვთა სახლების შემცირებაა.

[ნინო ზედგინიძე, ახალციხე]