‘სამცხე–ჯავახეთში სამი სოციალური მუშაკი გაფიცვას არ შეუერთდა’– დავით გოგალაძე

სამცხე–ჯავახეთის სოციალური მომსახურების სააგენტოს ხელმძღვანელის დავით გოგალაძის განმარტებით, ამ ეტაპზე სააგენტო შეუფერხებლად მუშაობს, სამი სოციალური მუშაკი, რომელიც გაფიცვას არ შეუერთდა მუნიციპალიტეტებშია გადანაწილებული.

„დღეს სამუშაო ჯგუფი შეიქმნება სააგენტოში, რომელშიც გაერთიანდება უფროსი, მოადგილე და ფსიქოლოგი, გარდა ამისა, საჭიროების შემთხვევაში შეგვიძლია გამოვიძახოთ სპეციალისტი თბილისიდან. ყველანაირად ვეცდებით, რომ არაფერი გავაფუჭოთ, თუ გამოძახება იქნება, გავა ჯგუფი და გადაუდებელ შემთხვევებზე რეაგირებას შევძლებთ“, – განმარტავს დავით გოგალაძე.

რომელი სციალური მუშაკები არ შეუერთდნენ გაფიცვას გოგალაძე არ ამხელს. ამის შესახებ არც უფროსი სოციალური მუშაკი სამცხე–ჯავახეთში ნინო საანიშვილი საუბრობს: „გაფიცულები ვართ, სხვას ვერაფერს ვერ გეტვით“.

დღეიდან, 25 მარტიდან მთელი ქვეყნის მასშტაბით სოციალური მუშაკების გაფიცვა დაიწყო. სოციალური მომსახურების სააგენტოში დასაქმებული სოციალური მუშაკები უმძიმესი სამუშაო პირობების გაუმჯობესებასა და ბენეფიციარებისათვის ეფექტიანი და მყისიერი მომსახურებების შექმნას ითხოვენ.

სოცმუშაკები უკვე ორი თვეა აფრთხილებენ სახელმწიფოს, რომ იმ შემთხვევაში, თუ მათ არ მიეცემათ შესაფერისი შრომითი პირობები, დარეგულირებული გრაფიკი და შესასრულებელი საქმეების ადეკვატური ოდენობა, ისინი გაიფიცებიან. სოციალურ მუშაკებს ფეისბუქზე გვერდიც აქვთ შექმნილი, სადაც თავიანთი პროტესტის შესახებ აქტიურად წერენ.

სამცხე–ჯავახეთის ექვს მუნიციპალიტეტში რვა სოციალური მუშაკი და ერთი უფროსი სოციალური მუშაკია. მათ შორის ახალციხესა და ასპინძაში – ორ–ორი, ბორჯომში, ნინოწმინდაში, ახალქალაქსა და ადიგენში კი ერთ–ერთი სოციალური მუშაკია. მათ მუშაობა მძიმე პირობებში უხდებათ.

[თნათინ ზაზაძე, ახალციხე]