„ახლა საით წავიდეთ“– მოხეში ფილმის ჩვენება გაიმართა

ლიბანელი რეჟისორის ნადინე ლაბაკის კანის ფესტივალის გამარჯვებული ფილმი „ახლა საით წავიდეთ“, მოხეს საჯარო სკოლის მოსწავლეებმა გუშინ, 7 მარტს ნახეს.

ფილმის სიუჟეტი ლიბანის ერთ-ერთ პატარა სოფელში ვითარდება. აქ ქრისტიანები და მუსლიმები ერთად ცხოვრობენ. მიუხედავად იმისა, რომ კულტურულადაც და გეოგრაფიულადაც აბსოლუტურად იდენტურ სივრცეში იმყოფებიან, რელიგიური სხვაობა ამ ორ ჯგუფს ერთმანეთის მტრად აქცევს.

მაშინ, როცა ფილმის პერსონაჟი მამაკაცები მუდმივად მზად არიან ბრძოლისთვის, იერიშისთვის, შურისძიებსითვის, პერსონაჟი ქალები ყველა შესაძლო ხერხით ცდილობენ მშვიდობის მოპოვებასა და შენარჩუნებას.

ფილმის დასრულების შემდეგ, მოსწავლეებმა პედაგოგებთან ერთად იმსჯელეს თუ რამდენად მნიშვნელოვანია სხვადასხვა აღმსარებლობის მქონე ადამიანების თანაცხოვრებისას შეინარჩუნო მშვიდობა და რა როლი აკისრია ქალს მშვიდობის შესანარჩუნებლად.

„ჩემი აზრით ეს ფილმი უფრო მეტს ამბობს, ვიდრე ამას ადამიანები ერთმანეთს კანონის და სიტყვის საშუალებით ვუხსნით. ჩვენს სოფელშიც არიან, ქრისტიანები და მუსლიმები, რომელთა ურთიერთობები სამწუხაროდ ხშირად იძაბება და კარგია, რომ ფილმს მოსწავლეებმა უყურეს “ - ამბობს ადიგენის მუნიციპალიტეტის სოფელ მოხეს საჯარო სკოლის პედაგოგი თამაზ მიქელაძე.

ღონისძიება სამოქალაქო განათლების პროგრამის „მომავლის თაობის“ ფარგლებში, ახალციხის ახალგაზრდული ცენტრის ორგანზიებით ჩატარდა.

[sknews.ge]