ახალციხეში მშვიდობის საერთაშორისო დღე აღნიშნეს

ფილმის ჩვენება სამცხე-ჯავახეთის სახელმწიფო სასწავლო უნივერსიტეტის მეორე კორპუსში გაიმართა. ფილმი „კონფლიქტებისა და მოლაპარაკებების საერთაშორისო კვლევითი ცენტრის“ სამოქალაქო საზოგადოების განვითარების პროგრამის ფარგლებში აჩვენეს.

დოკუმენტური ფილმის რეჟისორი ბრიტანელი დოკუმენტალისტი ჯერემი გილია. სწორედ ჯერემი გილის დამსახურებაა მშვიდობის საერთაშორისო დღის საბოლოო აღიარება, რომელიც გაეროს გენერალური ასამბლეის მიერ ჯერ კიდევ 1981 წელს დაარსდა.

ჯერემი გილის პროექტი “ერთ დღესაც იქნება მშვიდობა”, წარმოადგენს ფილმს, რომელიც მრავალ ქვეყანაშია გადაღებული. მასში ასახულია რეჟისორის მოგზაურობა და მისი შეხვედრები ადამიანებთან, რომელთაც უნდათ მშვიდობა და რომელთაც თავის თავზე გამოსცადეს ომის საშინელება.

ფილმის დასრულების შემდეგ სტუდენტებმა ომისა და მშვიდობის თემაზე იმსჯელეს.

ყოველ წელს გაეროს გენერალური მდივანი 21 სექტემბერთან დაკავშირებით 100 დღით ადრე სპეციალურ მიმართვას ავრცელებს. წლევანდელი მიმართვის მესიჯია „განათლება მშვიდობისთვის“.

„ეს ნიშნავს, რომ საზოგადოებამ უნდა იცოდეს მშვიდობის კულტურა, და ის, რომ კონფლიქტების გადასაწყვეტად არსებობს სხვადასხვა გზები, ასევე ჰუმანური განათლება, რომელიც მშვიდობის გარანტია“, - ამბობს კონფლიქტებისა და მოლაპარაკებების საერთაშორისო კვლევითი ცენტრის სამოქალაქო საზოგადოების განვითარების პროგრამის მენეჯერი შორენა ლორთქიფანიძე.

დღევანდელ დღესთან დაკავშირებით სხვადასხვა ღონისძიებები საქართველოს თითქმის ყველა ქალაქში მიმდინარეობს. თითქმის 6 წელია მშვიდობის საერთაშორისო დღეს საქართველოში აქტიურად აღინიშნება.



[მანანა სარაშვილი, ახალციხე]