პატრიარქი მრევლს ერთობლივი ძალებით თავშესაფრის შეძენას სთხოვს

წირვა–ლოცვის დასრულების შემდეგ ილია მეორემ მოწყალების მნიშვნელობაზე ისაუბრა: „ადამიანი უნდა ეძებდეს გაჭირვებულ ადამიანს, უნდა გავზარდოთ ჩვენი შვილები ამ სულისკვეთებით, მოწყალების სულისკვეთებით“.

პატრიარქის განცხადებით, მას აქვს სურვილი გაჭირვებული ადამიანებისთვის მრევლმა თავშესაფარი შეიძინოს: „მე მაქვს სურვილი, რომ ჩვენმა მრევლმა ვიყიდოთ სახლი და ეს სახლი გაჭირვებული ადამიანებისთვის მოვაწყოთ თავშესაფრად. განსაკუთრებული ყურადღება უნდა მივაქციოთ ჩვენს ინტელიგენციას, ჩვენს მწერლებს, მხატვრებს, ხელოვნების მუშაკებს, რომელთაც არ შეუძლიათ თხოვნა და არ შეუძლიათ ვაჭრობა. მათ უნდა დავეხმაროთ და უნდა ჰქონდეთ საშუალება, რომ გამოვიდნენ სტრესისგან. თქვენ ყველას გევალებათ, შევკრიბოთ ფული და ვიშოვოთ ასეთი სახლი, სადაც ჩვენ მივიღებთ გაჭირვებულ ადამიანებს, რამდენიმე დღით მაინც, ან უფრო მეტი", - მიმართა მრევლს პატრიარქმა.

მისივე თქმით, როცა ადამიანი დახმარებას გასცემს გაჭირვებულზე, დახმარების გამცემი უფრო ხარობს, ვიდრე ვინც მიიღო დახმარება. "ის, რაც გაეცი, შენია და დაგხვდება, ის გაცხონებს და ის დაგეხმარება. შენი მოწყალება, როგორც ანთებული სანთელი, გაგიძღვება წინ და მიგიყვანს სასუფეველში. მრავალი ადამიანი მინახავს, რომელიც მოწყალებას აძლევდა და ბედნიერად დამთავრდა მათი ცხოვრება", - ბრძანა პატრიარქმა.




[ნინო ნარიმანიშვილი, ახალციხე]