'არ შეიძლება მშობლისადმი უღირსად მოქცევა' – პატრიარქის ქადაგება [Video]

„მე მინდა დღეს ვისაუბრო ერთ საკითხზე, რომელიც მარადიული და მძიმე საკითხია. ეს არის მშობლისა და შვილის დამოკიდებულება. ძალიან ხშირი შემთხვევაა, როდესაც მშობლებს არ ესმით შვილების და შვილებს არ ესმით მშობლების. ძალიან ხშირი შემთხვევაა, როცა აზროვნება, შეხედულება, მსოფლმხედველობა განსხვავდება. აი, ამიტომ ხშირია კონფლიქტი მათ შორის. თქვენ იცით, რომ ერთ-ერთი კანონი, რომელიც ღმერთმა მისცა კაცობრიობას, არის: "პატივი ეც მამასა შენსა და დედასა შენსა", მაგრამ ამით არ მთავრდება, "რათა კეთილი გეყოს შენ და მრავალჟამიერ იყო ქვეყანასა ზედა". ამიტომ მე მინდა განსაკუთრებული ყურადღება მივაქციო თქვენს დამოკიდებულებას მშობლების მიმართ. მშობლის შეიძლება არ გესმოდეს, შეიძლება განსხვავებული აზრი გქონდეთ შენ და მშობელს, მაგრამ შენ ვალდებული ხარ, მშობლის საშუალებით მიიღო მადლი ღვთისა, მადლისა სულისა წმინდისა და ამით კეთილ გეყოს შენ და დღეგრძელი იყო ქვეყანასა ზედა", - იქადაგა სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა, უწმინდესმა და უნეტარესმა ილია მეორემ.

ქადაგებისას პატრიარქმა თავისი სტუდენტობის პერიოდი გაიხსენა.

„მე მახსენდება ჩემი სტუდენტობის დრო, როცა ვბრუნდებოდი სასწავლებლიდან სახლში, ჩემი ერთი სურვილი იყო, რითი გამეხარებინა მშობლები. და აუცილებლად საჩუქრები იყო გამზადებული მათთვის. აი ამიტომ, თქვენც გირჩევთ, რომ ყურადღება მიაქციეთ ამ საკითხს. არ შეიძლება მშობლისადმი უხეშად მოქცევა, მშობელი ეს არის ღვთისაგან მადლმოსილი, მადლი ეძლევა მშობელს, რომ გადაცსეს თავის შვილებს და ეს არ უნდა დაკარგოთ თქვენ“, – განაცხადა ილია მეორემ.



[ნინო ნარიმანიშვილი, ახალციხე]