ილია მეორემ მრევლს ერთი დღე–ღამე ლოცვისკენ მოუწოდა

"გახსოვთ, სახარებაში წერია, რომ ბოროტი ძალა განიდევნება ლოცვითა და მარხვით. მე ძალიან მომწონს შემოთავაზებული წინადადება. თან ძნელი არ არის, რომ ერთი დღე და ღამე ადამიანმა ილოცოს და იმარხულოს. იქნება სპეციალური ლოცვები _ მადლობის ლოცვა, წმინდა სამების, იესოს, ღვთისმშობლის და სხვა ლოცვები. ჩვენ უნდა დავიწყოთ წმინდა სამების ამ წმინდა ტაძრიდან. აი დავუშვათ დღის 12 საათიდან, მეორე დღის 12 საათამდე მორიგეობით წაიკითხავენ ლოცვებს და გვარის შესაწირავი იქნება სამი ცხვარი, რომელიც გამოყენებული იქნება გაჭირვებული ოჯახებისათვის. მე ვფიქრობ, ეს მოიტანს საოცარ შედეგს, რომ გაძლიერდეს სიყვარული ხალხში, ურთიერთპატივისცემა და თანადგომა", – ამ სიტყვებით მიმართა მრევლს პატრიარქმა.

მისი თქმით, მოკლე ხანში მოამზადებენ ლოცვებს, რომელიც ადამიანს სულიერ კიბეზე ასვლაში დაეხმარება: "ხშირად მეკითხებიან, აი ამ ორმოცი წლის მანძილზე თუ რა გაკეთდა ყველაზე მნიშვნელოვანი. მე ვფიქრობ, ერთ-ერთი ყველაზე მნიშვნელოვანი იყო ის, რომ დავიბრუნეთ უძველესი ტიპიკონი შვიდი ლოცვისა, შვიდგზის ლოცვა ეს ღვთის დიდი წყალობაა და იგი სასწაულებს ახდენს. ასევე ძალიან მნიშვნელოვანია, რომ განახლდა გვარების დალოცვა, მაგრამ ალბათ მარტო დალოცვა არ არის საკმარისი. უნდა გძალიერდეს ლოცვა. ჩვენი ლოცვა არ არის ფანატიკური მოქმედება, ჩვენი ლოცვა უშუალო კავშირია ღმერთთან".

[sknews.ge]