რა ეტაპზეა ადიგენში მომხდარი რელიგიური დაპირისპირების საქმის ძიება

ადიგენის რაიონული სამმართველო სოფელ ადიგენში მომხდარი კონფლიქტის დროს დაშავებულების სამედიცინო ექსპერტიზის პასუხებს ელოდება. როგორც მუსლიმი თემის ინტერესების დამცველები, ტოლერანტობისა და მრავალფეროვნების ინსტიტუტის (TDI) იურისტი შოთა თუთბერიძე და „ადამიანის უფლებების სწავლებისა და მონიტორინგის ცენტრის“ ( EMC) იურისტი თამარ იაკობიძე ამბობენ, დაშავებულებს ექსპერტიზა დაგვიანებით ჩაუტარდათ.

„შესაძლო იყო, რომ დაშავებულებს დაზიანებები შემსუბუქებოდათ, ან საერთოდ გაქრობოდათ. ჩვენ მოვითხოვეთ ექსპერტიზა და რამდენიმე დღის მოგვიანებით ჩაუტარეს“, – ამბობს თუთბერიძე და ამატებს, რომ ამ დრომდე ექსპერტიზის პასუხები ადვოკატებისთვის ცნობილი არ არის.

თუმცა, ექსპერტიზის პასუხები ჯერ არც შინაგან საქმეთა სამინისტროს მიუღია.

იურისტების თქმით, საქმისთვის მნიშვნელოვანია ადიგენის მუნიციპალიტეტის გამგებლის, ზაქარია ენდელაძის დაკითხვა.

„ის არ იყო ჩხუბში ჩართული, მოშორებით იდგა და რაც ხდებოდა სხვებთან შედარებით მშვიდად უყურებდა. ბუნებრივია, ყველაზე უკეთ მას შეუძლია მომხდარის გახსენება. გამოძიებისთვის კიდევ დროს დიდი მნიშვნელობა აქვს, მას ვიდრე კარგად ახსოვს, მანამდე უნდა გამოკითხო. აუცილებელია გამგებლის დაკითხვა“, – ამბობს თუთბერიძე.

თუმცა, როგორც შინაგან საქმეთა სამინისტროში აცხადებენ, გამგებელი ამ დრომდე არ დაუკითხავთ: „გამოკითხვები გრძელდება, აუცილებლად დაიკითხება ყველა პირი, ვინც აუცილებელია“.

თუთბერიძე კი ფიქრობს, რომ გამოძიება იყინება: „თუ ეს პროცესები კიდევ არაგონივრულად გაიწელება აშკარა იქნება, რომ გამოძიება ხელოვნურად ფერხდება და ფაქტების მიჩქმალვას ცდილობენ“.

თამარ იაკობაძის თქმით, გამოძიება გარდა მუსლიმი თემის იმ წარმომადგენლებისა, რომლებიც უკვე გამოკითხა, სხვების გამოკითხვასაც აპირებდა: „ვის დაკითხვას აპირებდნენ, ჩვენთვის უცნობია, რადგან მაშინ აცხადებდნენ, რომ ჯერ თავადაც უნდა შეთანხმაბულიყვნენ თუ ვის გამოკითხავდნენ. ჩვენ ვუთხარით, რომ თუ მუსლიმებს დაიბარებდნენ, დაგვკავშირებოდნენ. ამ დრომდე არავინ შემოგვხმიანებია“.

შეგახსენებთ, რომ ადიგენის რაიონულმა სამმართველომ სოფელ ადიგენში საფლავების საკითხთან დაკავშირებით რელიგიურ ნიადაგზე შექმნილი კონფქლიტის ფაქტზე ძიება სსკ–ის 156–ე მუხლის პირველი ნაწილით დაიწყო, რაც დევნას (სიტყვის, აზრის, სინდისის, აღმსარებლობის, რწმენის ან მრწამსის გამო, ანდა მის პოლიტიკურ საზოგადოებრივ, პროფესიულ, რელიგიურ ან მეცნიერულ მოღვაწეობასთან დაკავშირებით) გულისხმობს. გამოძიება პირველ მარტს დაიწყო.

[თამუნა უჩიძე, ადიგენი]