აწყურის კულტურის სახლს კეთილმოწყობილი ეზო და გარეგანათება ექნება

სატენდერო დოკუმენტაციის მიხედვით, იგეგმება კულუტრის სახლის შენობის გარეფასადის რეაბილიტაცია, გადაიხურება სახურავი, მოეწყობა ეზო და დამონტაჟდება გარეგანათება.

კულტურის სახლის ეზოში გაკეთდება ბუნებრივსაფარიანი სპორტული მოედანი, ასევე აშენდება სათავსო, სადაც შეშის შენახვას შეძლებენ.
ახალციხის მუნიციპალიტეტის მერიამ ტენდერი 105 439 ლარზე 26 მარტს გამოაცხადა, წინადადებების მიღება 12 აპრილიდან იწყება. სამუშაოები ხელშეკრულების გაფორმებიდან 14 კვირის ვადაში უნდა დასრულდეს.

აწყურის კულტურის სახლის რეაბილიტაციის პირველი ეტაპი 2017 წელს ჩაუტარდა. ადგილობრივი ბიუჯეტის და რეგიონებში განსახურციელებელი პროექტების ფონდის დაფინანსებით, შენობის შიდა ინტერიერი მოეწყო, გარემონტდა სველი წერტილები და შეიცვალა კარ–ფანჯარა. აღნიშნულისთვის 110 556 ლარი დაიხარჯა.

[თინათინ ზაზაძე, ახალციხე]