”ევროპული ცენტრი” სტუდენტებს სტაჟირებას სთავაზობს

შეხვედრა უნივერსიტეტის ბიბლიოთეკაში შედგა. პროექტის შესახებ სტუდენტებს პროექტის ხელმძღვანელი გიორგი ჯაშიაშვილი და აღმასრულებელი დირექტორი ეთერ სანაია ესაუბრნენ.

მოკლევადიან გაცვლით კურსებში მონაწილეობა 18-დან 35 წლამდე ასაკის მსურველებს შეუძლიათ. შერჩევა ორ ეტაპიანია. პირველ ეტაპზე მონაწილეობის მსურველებმა სააპლიკაციო ფორმა უნდა შეავსონ, მეორე ეტაპი კი გასაუბრება იქნება. შერჩეულ პიროვნებებს ერთი კვირის განმავლობაში დაუკავშირდებიან. პირველ ეტაპზე ინგლისური ენის ცოდნა სავალდებულო არ არის, ჯგუფს თარჯიმანი მიყვება.

თითოეული პროგრამის საფასური 1000-დან 1500 ევრომდეა. თუმცა, მსურველებს შეუძლიათ მოიპოვონ 30%, 50% და 70%-იანი გრანტები. ერთ სტუდენტს, რომელიც რეიტინგში სამეულში მოხვდება, ცენტრი დააფინანსებს.

ამ მიმართულებით ცენტრი ხუთი წელია მუშაობს. იგი მსურველებს სტაჟირებას 13 ქვეყანაში სთავაზობს.

[ნინო გოგოლაძე, ბექა რეხვიაშვილი, ახალციხე]